உத்தரப் பிரதேசத்தின் ஷாம்லி மாவட்டத்தைச் சேர்ந்த ஆயுஷ் மாலிக் என்ற இளைஞர், காதலித்த பெண்ணை நிக்காஹ் (திருமணம்) செய்வதற்காக சில மாதங்களுக்கு முன்பு இஸ்லாம் மதத்திற்கு மாறியதாகக் கூறி பெரும் பரபரப்பை ஏற்படுத்தியிருந்தார். சமூக ஊடகங்களில் தன்னை ‘அலி முகமது’ என்று அழைத்துக்கொண்ட அவர், தாடி மற்றும் இஸ்லாமிய உடையில் இருக்கும் வீடியோக்கள் அப்போது வெளியாகி இந்து அமைப்புகளிடையே கடுமையான கொந்தளிப்பை ஏற்படுத்தின. இது தொடர்பாகப் பதியப்பட்ட வழக்கில், மதமாற்றத்திற்குத் தூண்டியதாகக் கூறி இதுவரை மூன்று பேரை போலீஸார் கைது செய்து சிறையிலும் அடைத்துள்ளனர்.
இந்நிலையில், இந்தச் சம்பவத்தில் தற்போது ஒரு புதிய திருப்பமாக ஆயுஷ் மாலிக் மீண்டும் சனாதன தர்மத்திற்கு (இந்து மதம்) திரும்பியதாகக் கூறப்படும் ‘கர் வாப்ஸி’ வீடியோ ஒன்று சமூக வலைத்தளங்களில் வைரலாகி வருகிறது. தனது வீட்டில் உள்ள சிறிய கோவிலில் பெற்றோருடன் சேர்ந்து அவர் அனுமனை வழிபட்டு பூஜைகள் செய்யும் அந்த வீடியோவில், தான் செய்த தவறுக்காகப் பெற்றோரிடம் மன்னிப்புக் கேட்டு மீண்டும் அவர்களுடனேயே வாழ விரும்புவதாகக் கூறுகிறார். எனினும், தற்போது தீயாய் பரவி வரும் இந்த புதிய வீடியோவின் உண்மைத்தன்மை இன்னும் அதிகாரப்பூர்வமாகவோ அல்லது சுயாதீனமாகவோ உறுதிப்படுத்தப்படவில்லை.