திருப்பத்தூர் மாவட்டம் வாணியம்பாடி அருகே பள்ளி மாணவிக்குக் காதல் தொல்லை கொடுத்த வாலிபர், அதனைத் தட்டிக்கேட்ட மாணவியின் தந்தையைத் தாக்கிய சம்பவம் அதிர்ச்சியை ஏற்படுத்தியுள்ளது. மதனாஞ்சேரி பகுதியைச் சேர்ந்த கூலித் தொழிலாளியின் மகளை, அதே பகுதியைச் சேர்ந்த அனுமுத்து என்ற இளைஞர் தொடர்ந்து பின்தொடர்ந்து தொந்தரவு செய்து வந்துள்ளார். இது குறித்து மாணவியின் பெற்றோர் அந்த இளைஞரின் வீட்டிற்குச் சென்று எச்சரித்த நிலையில், ஆத்திரமடைந்த அனுமுத்து தனது நண்பர்களுடன் சேர்ந்து மாணவியின் தந்தையை வழிமறித்துக் கொடூரமாகத் தாக்கியுள்ளார்.
இந்தத் தாக்குதலில் தலையில் பலத்த காயமடைந்த மாணவியின் தந்தை, வாணியம்பாடி அரசு மருத்துவமனையில் அவசரச் சிகிச்சைக்காக அனுமதிக்கப்பட்டுள்ளார். தன் காதல் விருப்பத்தை ஏற்காத ஆத்திரத்தில் ஒரு தந்தையையே தாக்கிய வாலிபரின் செயல் அப்பகுதியில் பெரும் பரபரப்பை உண்டாக்கியுள்ளது. இது தொடர்பாகப் பாதிக்கப்பட்ட குடும்பத்தினர் அளித்த புகாரின் பேரில், காவல்துறையினர் வழக்குப் பதிவு செய்து தலைமறைவாக உள்ள வாலிபர் மற்றும் அவரது நண்பர்களைத் தீவிரமாகத் தேடி வருகின்றனர்.