இந்தோனேசியாவில் சிறுமி ஒருவர் தனது பள்ளிப் பையில் ஒரு பெரிய பாம்பைக் கொண்டு வந்த வீடியோ சமூக வலைதளங்களில் வைரலாகி வருகிறது. அந்த வீடியோவில், சிறுமி தனது பையிலிருந்து மிகவும் சாதாரணமாக ஒரு பெரிய பாம்பை வெளியே எடுக்கிறார். அதைக் கண்டு அதிர்ச்சியடைந்த அவரது தந்தை அலறியபடி அங்கிருந்து விலகிச் செல்லுமாறு கூறுகிறார். ஆனால், அந்தச் சிறுமியோ எவ்வித அச்சமுமின்றி அந்தப் பாம்பை ஒரு பொம்மையைப் போலக் கையாண்டு விளையாடுகிறார்.
அந்தப் பாம்பை தனது செல்லப் பிராணி போலக் கருதும் அந்தச் சிறுமி, அதைத் தூக்கிக் கொண்டு அங்குள்ள மற்ற குழந்தைகளிடமும் காட்டுகிறார். இதைப் பார்த்த நெட்டிசன்கள் பலரும் அந்தச் சிறுமியின் தைரியத்தைக் கண்டு வியந்தாலும், ஒரு ஆபத்தான பாம்புடன் குழந்தையை விளையாட அனுமதித்த பெற்றோரை கடுமையாக விமர்சித்து வருகின்றனர். “இது மிகவும் ஆபத்தானது, ஒரு நொடியில் விபரீதம் ஏற்படலாம்” எனப் பலரும் கவலை தெரிவித்துள்ளனர்.
View this post on Instagram
இந்தோனேசியாவில் சில வகை மலைப்பாம்புகளைச் செல்லப் பிராணிகளாக வளர்க்கும் பழக்கம் இருந்தாலும், பள்ளிக்கூடப் பையில் வைத்து அதைக் கொண்டு வந்ததும், அதன் பிறகு அந்தச் சிறுமி காட்டிய துணிச்சலும் இணையவாசிகளிடையே பெரும் விவாதத்தை ஏற்படுத்தியுள்ளது. இதுபோன்ற செயல்கள் குழந்தைகளின் உயிருக்கு ஆபத்தை விளைவிக்கும் என்பதால், பெற்றோர்கள் அதிக கவனத்துடன் இருக்க வேண்டும் என எச்சரிக்கப்பட்டுள்ளது.