டெல்லி மாளவியா நகர் பகுதியில் வசித்து வரும் ரூபி ஜெயின் என்பவர், தனது கட்டிடத்தின் மேல் தளத்தில் தங்கியிருக்கும் அருணாச்சல பிரதேசத்தைச் சேர்ந்த மூன்று இளம்பெண்களுடன் கடுமையான வாக்குவாதத்தில் ஈடுபட்டுள்ளார். அந்தப் பெண்கள் கோடை வெப்பத்தைத் தவிர்க்கத் தங்களது அறையில் குளிர்சாதன வசதி (AC) செய்து கொண்டிருந்தபோது, அதிலிருந்து வெளிப்பட்ட தூசு மற்றும் மணல் தரைத்தளத்தில் விழுந்ததே இந்த மோதலுக்குக் காரணமாகச் சொல்லப்படுகிறது. இந்தச் சிறிய விவகாரத்திற்காக ரூபி ஜெயின் அந்தப் பெண்களை மிகக் கேவலமான சொற்களால் வசைபாடத் தொடங்கியுள்ளார்.
வாக்குவாதம் முற்றிய நிலையில், அந்தப் பெண்களின் பூர்வீகம் மற்றும் ஒழுக்கம் குறித்து இழிவான கருத்துகளை ரூபி ஜெயின் முன்வைத்துள்ளார். “நீங்கள் 500 ரூபாய்க்கு யாருடனும் படுக்கக்கூடியவர்கள் தானே, என் கணவருடன் படுங்கள், அதற்கான பணத்தைப் பெற்றுக் கொள்ளுங்கள்” என்று பொதுவெளியில் அருவருக்கத்தக்க வகையில் பேசியுள்ளார். ஒரு பெண்ணே சக பெண்களைப் பார்த்து இவ்வளவு தரம் தாழ்ந்த முறையில் பேசியது அங்கிருந்தவர்களையும், இந்த வீடியோவைப் பார்த்தவர்களையும் அதிர்ச்சியில் ஆழ்த்தியுள்ளது.
பாதிக்கப்பட்ட அந்தப் பெண்கள், ரூபி ஜெயின் தங்களை இழிவுபடுத்தியதைக் கைபேசியில் வீடியோ எடுத்து சமூக வலைதளங்களில் வெளியிட்டனர். இந்த வீடியோ வைரலாகிப் பெரும் கொந்தளிப்பை ஏற்படுத்தியதைத் தொடர்ந்து, காவல்துறையினர் ரூபி ஜெயின் மற்றும் அவரது கணவர் ஹர்ஷ் சிங் ஆகியோர் மீது வழக்குப் பதிவு செய்துள்ளனர். இனவெறி மற்றும் ஆபாசப் பேச்சுகள் தொடர்பாக டெல்லி காவல்துறை தற்போது தீவிர விசாரணை மேற்கொண்டு வருகிறது.