உத்தரப் பிரதேச மாநிலம் மதுராவில், காலை நேரத்தில் பள்ளிக்கு சென்ற சிறுவன் ஒருவனை பின் தொடர்ந்து வந்த குரங்குக் கூட்டம் திடீரெனத் தாக்க முயன்ற அதிர்ச்சி சம்பவம் நிகழ்ந்துள்ளது. இது தொடர்பான நடுங்க வைக்கும் சிசிடிவி காட்சிகள் தற்போது சமூக வலைதளங்களில் பரவி வருகின்றன.
சிறுவன் வீதியில் நடந்து சென்று கொண்டிருந்தபோது, பின்னால் வந்த குரங்குக் கூட்டம் அவனைச் சூழ்ந்து தாக்கத் தொடங்கியது. அந்தச் சமயத்தில் அச்சிறுவனுக்கு மிக அருகில் நடந்து சென்ற பெண் ஒருவர், பயத்தில் சிறுவனைக் காப்பாற்றாமல் அங்கிருந்து ஓடிச் சென்றார். இருப்பினும், அதே வழியில் வந்த பால் வியாபாரி ஒருவர் கொஞ்சமும் யோசிக்காமல் துணிச்சலுடன் முன்னால் வந்து குரங்குக் கூட்டத்தை விரட்டியடித்தார். அவரது இந்தத் துரிதமான செயலால் சிறுவன் காயங்களின்றி நல்வாய்ப்பாகக் காப்பாற்றப்பட்டான்.
சிறுவனின் உயிரைக் காப்பாற்றிய பால் வியாபாரியின் தைரியத்தைப் பொதுமக்கள் மற்றும் சமூக வலைதளப் பயனர்கள் பெரிதும் பாராட்டி வருகின்றனர். அதேவேளையில், ஆபத்தான சூழலில் சிறுவனைத் தவிக்கவிட்டு ஓடிய பெண்ணின் செயல் குறித்து இணையத்தில் விவாதங்கள் எழுந்து வருகின்றன. மேலும், நகர்ப்புறங்களில் அதிகரித்து வரும் குரங்குகளின் தொல்லையைக் கட்டுப்படுத்த உள்ளாட்சி நிர்வாகமும் வனத்துறையும் உடனடியாக நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.