ராஜஸ்தான் மாநிலம் ஜெய்ப்பூரில் உள்ள மானசரோவர் பகுதியில் அதிவேகமாக வந்த ‘தார்’ (Thar) ரக கார் ஒன்று, ஸ்கூட்டரில் சென்று கொண்டிருந்த நேஹா ஸ்ரீவஸ்தவா என்ற இளம்பெண் மீது பயங்கரமாக மோதியது. மோதிய வேகத்தில் கார் நிற்காமல், அந்தப் பெண்ணை சுமார் 20 முதல் 25 அடி தூரம் வரை சாலையில் இழுத்துச் சென்றது. இந்த கோர விபத்தை ஏற்படுத்திய கார் ஓட்டுநர், அந்தப் பெண்ணை மீட்காமல் அங்கிருந்து அதிவேகமாக தப்பிச் சென்றார்.
இந்த விபத்தில் பலத்த காயமடைந்த நேஹா, உடனடியாக மீட்கப்பட்டு மருத்துவமனையில் அனுமதிக்கப்பட்டார். தற்போது அவரது நிலைமை மிகவும் கவலைக்கிடமாக இருப்பதாகவும், அவர் வென்டிலேட்டர் உதவியுடன் தீவிர சிகிச்சை பிரிவில் சிகிச்சை பெற்று வருவதாகவும் மருத்துவமனை வட்டாரங்கள் தெரிவிக்கின்றன. காய்கறி வாங்குவதற்காக நேஹா வீட்டை விட்டு வெளியே வந்தபோது இந்த துரதிர்ஷ்டவசமான சம்பவம் நிகழ்ந்துள்ளது.
இந்த விபத்து தொடர்பான காட்சிகள் அருகில் இருந்த சிசிடிவி (CCTV) கேமராவில் பதிவாகியுள்ளது. அந்தப் பதிவுகளைக் கைப்பற்றியுள்ள காவல்துறையினர், கார் எண்ணை வைத்து தலைமறைவாக உள்ள ஓட்டுநரைத் தேடி வருகின்றனர். தலைநகர் ஜெய்ப்பூரில் பட்டப்பகலில் நடந்த இந்த ‘ஹிட் அண்ட் ரன்’ சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது