டெல்லியின் பரபரப்பான கரோல் பாக் சந்தைப் பகுதியில், பழுதடைந்த மின்சார மீட்டர் பெட்டியை இரண்டு நபர்கள் பரிசோதித்துக் கொண்டிருந்தபோது, திடீரென ஏற்பட்ட பயங்கரமான மின் கசிவு வெடிப்புச் சம்பவம் அங்கிருந்த சிசிடிவி கேமராவில் பதிவாகி அதிர்ச்சியை ஏற்படுத்தியுள்ளது. அந்த மீட்டர் பெட்டி திடீரென பயங்கர சத்தத்துடன் வெடித்ததில், அங்கிருந்த நபர் ஒருவர் மீது கணப்பொழுதில் தீப்பிழம்பு சூழ்ந்தது. உடலெங்கும் தீப்பற்றிய நிலையில் அந்த நபர் வலியால் தெருவில் துடிதுடித்துக் கொண்டிருந்தபோதும், அங்கிருந்த பொதுமக்கள் அவருக்கு உதவ முன்வராமல் வேடிக்கை பார்த்துக் கொண்டிருந்தது மனிதநேயமற்ற கொடுமையின் உச்சமாக அமைந்துள்ளது.
https://twitter.com/rameshofficial0/status/2078921171043786777/photo/1
இந்தக் கொடூரமான விபத்து, மக்கள் நடமாட்டம் அதிகம் உள்ள வணிகப் பகுதிகளில் மின்சாரத் துறை எந்த அளவிற்கு அலட்சியமாகச் செயல்படுகிறது என்பதை அம்பலப்படுத்தியுள்ளது. ஆபத்தான மற்றும் தளர்வான மின்கம்பிகளை முறையாகப் பராமரிக்காமல் பொதுவெளியில் அப்படியே விட்டுச் சென்றதே இந்த விபத்திற்குக் காரணம் எனப் பொதுமக்கள் குற்றம் சாட்டுகின்றனர். இத்தகைய அலட்சியப் போக்கு இனிமேலும் தொடராமல் இருக்கவும், பொதுமக்களின் பாதுகாப்பை உறுதி செய்யவும் மின்சாரத் துறை உடனடியாக உரிய நடவடிக்கை எடுக்க வேண்டும் என்பதே அனைவரின் கோரிக்கையாக உள்ளது.