மத்திய அரசின் உத்தரவாதத்துடன் கூடிய தபால் நிலைய மாதாந்திர வருமானத் திட்டம், சந்தை ஏற்ற இறக்கங்கள் இல்லாத பாதுகாப்பான முதலீட்டைத் தேடுபவர்களுக்கு ஒரு சிறந்த வாய்ப்பாகும். குறிப்பாக, ஓய்வூதியம் பெறுவோர், முதியவர்கள் மற்றும் மாதந்தோறும் நிலையான பணப்புழக்கத்தை எதிர்பார்ப்பவர்களுக்கு இத்திட்டம் பெரிதும் உதவுகிறது. இதில் முதலீடு செய்யப்படும் அசல் தொகைக்கு எவ்வித ஆபத்தும் இல்லாததால், நடுத்தர வர்க்கத்தினருக்கு இதுவொரு மிகச்சிறந்த முதலீட்டுத் தேர்வாகக் கருதப்படுகிறது.
தற்போது இத்திட்டத்திற்கு ஆண்டுக்கு 7.4 விழுக்காடு வட்டி விகிதம் வழங்கப்படுகிறது. இத்திட்டத்தின் கீழ் ஒரு தனிநபர் தனது கணக்கில் அதிகபட்சமாக ரூ. 9 லட்சம் வரையிலும், கூட்டுக்கணக்கில் அதிகபட்சமாக ரூபாய் 15 லட்சம் வரையிலும் முதலீடு செய்ய முடியும். இந்த வட்டி விகிதங்கள் மத்திய அரசால் காலாண்டுக்கு ஒருமுறை மாற்றியமைக்கப்படும் என்பது குறிப்பிடத்தக்கது.
நீங்கள் கூட்டுக்கணக்கு தொடங்கி, அதில் அதிகபட்ச வரம்பான ரூபாய் 15 லட்சத்தை ஒரே முறையாக முதலீடு செய்தால், ஆண்டுக்கு ரூ. 1,11,000 வட்டி வருமானமாக கிடைக்கும். இதனை மாதக் கணக்கில் பிரிக்கும் போது, உங்களுக்குத் துல்லியமாக மாதம் ரூபாய் 9,250 நிலையான வருமானம் தங்கு தடையின்றி வந்து சேரும். இத்திட்டத்தின் முதிர்வு காலம் 5 ஆண்டுகள் ஆகும். இந்த 60 மாதங்களில் நீங்கள் மொத்தம் ரூ. 5,55,000 வட்டியைப் பெறுவதோடு, முதிர்வு காலத்தின் முடிவில் உங்களது அசல் தொகையான ரூ. 15 லட்சத்தையும் முழுமையாகத் திரும்பப் பெற்றுக்கொள்ளலாம்.
வரி விதிப்பு மற்றும் முன்கூட்டியே கணக்கை முடிப்பது போன்ற சில முக்கிய விதிகளையும் முதலீட்டாளர்கள் கவனத்தில் கொள்ள வேண்டும். இத்திட்டத்தில் செய்யப்படும் முதலீடுகளுக்கு வருமான வரிச் சட்டத்தின் பிரிவு 80சி-ன் கீழ் வரி விலக்கு எதுவும் கிடைக்காது. மேலும், மாதாந்திர வட்டிக்கு உங்களது வருமான வரி வரம்பின் அடிப்படையில் வரி விதிக்கப்படும், அஞ்சலகம் இதிலிருந்து மூலத்தில் வரி பிடித்தம் செய்யாது. ஒருவேளை அவசரத் தேவைக்காகக் கணக்கைத் தொடங்கிய முதல் ஆண்டிற்குள் மூட அனுமதி இல்லை. 1 முதல் 3 ஆண்டுகளுக்குள் கணக்கை முடித்தால் 2 விழுக்காடும், 3 ஆண்டுகளுக்குப் பிறகு ஆனால் 5 ஆண்டுக்கு முன் முடித்தால் 1 விழுக்காடும் அசல் தொகையிலிருந்து பிடித்தம் செய்யப்பட்டு மீதித் தொகை வழங்கப்படும்.