ராஜஸ்தான் மாநிலம் ஜெய்ப்பூரில், கிரண் மற்றும் பர்வேஷ் ஆகிய இருவரும் வாடகை வீடு ஒன்றில் கடந்த இரண்டு மாதங்களாக சேர்ந்து வாழ்ந்து வந்துள்ளனர். இந்நிலையில், இவர்களது வீட்டைப் பார்வையிட வந்த உரிமையாளர், வீடு பூட்டப்பட்டிருப்பதையும், அருகிலிருந்த தோட்டத்தில் புதிதாக தோண்டப்பட்ட குழியிலிருந்து ஒரு பெண்ணின் கை வெளியே தெரிவதையும் கண்டு அதிர்ச்சியடைந்து உடனடியாக காவல் துறைக்கு தகவல் அளித்தார்.
சம்பவ இடத்திற்கு விரைந்த போலீசார், மண்ணில் புதைக்கப்பட்டிருந்த உடலை தோண்டி எடுத்து, அது கிரண் என்பதை உறுதிசெய்து பிரேத பரிசோதனைக்கு அனுப்பி வைத்தனர். உத்தரப் பிரதேசத்தில் உள்ள அவரது குடும்பத்தினருக்கும் இது குறித்து தகவல் தெரிவிக்கப்பட்டுள்ளது. ஓரிரு நாட்களுக்கு முன்பே கிரணை கொலை செய்து புதைத்துவிட்டு பர்வேஷ் தப்பிச் சென்றிருக்கலாம் என முதற்கட்ட விசாரணையில் தெரியவந்துள்ள நிலையில், தலைமறைவாக உள்ள அவரை காவல்துறையினர் தீவிரமாக தேடி வருகின்றனர்.