தமிழக அரசியல் களத்தில் தமிழக வெற்றிக் கழகத்திற்கும் (தவெக) இந்திய கம்யூனிஸ்ட் கட்சிக்கும் இடையே நிலவி வரும் அரசியல் நகர்வுகள் தற்பொழுது பெரும் பரபரப்பை ஏற்படுத்தியுள்ளன. நடந்து முடிந்த சட்டமன்றத் தேர்தலில் திமுக கூட்டணியில் போட்டியிட்டு இரண்டு தொகுதிகளில் வென்ற இந்திய கம்யூனிஸ்ட் கட்சி, பின்னர் தவெக ஆட்சி அமைக்க ஆதரவுக்கரம் நீட்டியது. இருப்பினும், தவெக தலைமையிலான அமைச்சரவையில் பங்கேற்க கம்யூனிஸ்ட் கட்சி மறுப்புத் தெரிவித்து வெளியில் இருந்து மட்டுமே ஆதரவு வழங்கி வந்தது. இந்தச் சூழலில், சட்டமன்றத்தில் தவெக தலைவரும் முதலமைச்சருமான விஜய், முன்னாள் முதலமைச்சர் மு.க.ஸ்டாலினை மறைமுகமாகச் சாடும் வகையில் பேசிய குட்டி கதை சமூக வலைதளங்களில் பயங்கரமாக வைரலாகி, அரசியல் வட்டாரத்தில் சலசலப்பை ஏற்படுத்தியிருந்தது.
முதலமைச்சரின் இந்த விமர்சனப் பேச்சுக்கு பதிலடி கொடுக்கும் வகையிலும், தவெக அரசுக்கான தங்களின் ஆதரவு நிலைப்பாடு குறித்தும் இந்திய கம்யூனிஸ்ட் கட்சியின் மூத்த தலைவர் முத்தரசன் திருவாரூர் திருமண நிகழ்ச்சி ஒன்றில் ஒரு சுவாரசியமான குட்டி கதையைப் பகிர்ந்துள்ளார். ஆற்றுப்படுகையில் மேயும் ஆடு, மாடுகள் “இக்கரைக்கு அக்கரை பச்சை” என்று நினைத்து, இப்பகுதியை விட மறுபக்கம் பசுமையாக இருக்கும் என்ற ஆசையில் ஆற்றைக் கடந்து மந்தையாக அங்கே செல்லும் என்று அவர் விவரித்தார். ஆனால், அங்கே சென்ற பிறகுதான் முந்தைய இடத்தை விட நிலைமை மோசமாக இருப்பதும், நிலம் காய்ந்து கிடப்பதும் அவற்றுக்குத் தெரியவரும் என்றும்; உடனே திரும்ப முடியாமல் வேறு வழியின்றி கொஞ்ச நாளாவது அங்கேயே தங்கியிருக்க வேண்டிய சூழல் ஏற்படும் என்றும் அவர் அந்த கதையின் மூலம் சுட்டிக்காட்டினார்.
நான் யாரையும் குறிப்பிட்டுச் சொல்லவில்லை என்று முத்தரசன் மழுப்பினாலும், அவரின் இந்த “அக்கரை பச்சை” குட்டி கதை தவெக அரசுக்கு விடுக்கப்பட்ட ஒரு மறைமுக எச்சரிக்கையாகவே அரசியல் விமர்சகர்களால் பார்க்கப்படுகிறது. தவெக ஆட்சிக்கு ஆதரவு கொடுத்த போதிலும், தங்களின் அரசியல் நிலைப்பாட்டை மாற்றிக்கொள்ள கம்யூனிஸ்ட் கட்சி தயங்காது என்பதையும், இந்த ஆதரவு நிரந்தரமானது அல்ல என்பதையும் அவர் சூசகமாக உணர்த்தியுள்ளார். சமூக வலைதளங்களில் பலரும் தவெக அரசுக்கு அளித்து வரும் ஆதரவை இந்திய கம்யூனிஸ்ட் கட்சி விரைவில் வாபஸ் பெறக்கூடும் என்பதற்கான ஆரம்பப்புள்ளிதான் இந்த குட்டி கதை என்று விவாதிக்கத் தொடங்கியுள்ளதால், தமிழக அரசியல் களம் மேலும் சூடுபிடித்துள்ளது.