வீட்டு வேல செஞ்சவங்கள வச்சு பாட்டுக்கு கோரஸ் பண்ண ரஹமான்… சும்மாலாம் ஆஸ்கர் வர போகல- பிரபல நடிகர் பகிர்ந்த ஆச்சர்ய தகவல்!

இந்தி சினிமா பாடல்களைக் கேட்டுக் கொண்டிருந்த தமிழ் ரசிகர்களை தமிழ் பாடல்கள் பக்கம் திருப்பியவர் இளையராஜா என்றால், இந்தி ரசிகர்களையும் தமிழ் சினிமா பாடல்களைக் கேட்க வைத்தவர் ஏ ஆர் ரஹ்மான் என்று சொல்வார்கள்.

தான் அறிமுகமான ரோஜா திரைப்படத்தின் பாடல்கள் அனைத்தும் இந்தியா முழுவதும் ஹிட்டடித்தன. அதன் பின்னர் ரஹ்மான் மணிரத்னம் மற்றும் ஷங்கர் ஆகியோரோடு இணைந்து பணியாற்றிய படங்களின் பாடல்கள் எல்லாம் இந்தியா முழுவதும் வைரல் ஹிட்டாகின. பாடல்களுக்காகவே சில பாடல்கள் ஹிட்டாகின என்பதும் குறிப்பிடத்தக்கது.

ரஹ்மான் புதிய சென்சேஷனாக உருவான காலகட்டத்தில் இயக்குனர் விக்ரமனோடு இணைந்து பணியாற்றிய படம்தான் புதிய மன்னர்கள். இந்த படம் ஹிட்டாகவில்லை என்றாலும் பாடல்கள் சார்ட்பஸ்டர் ஹிட்டாகின. இந்த படத்தின் பாடல் ஒன்று பதிவின் போது பாடலின் நடுவே கோரஸ் வேண்டும் என இயக்குனர் விக்ரமன் கூறியுள்ளார்.

ஆனால் ரஹ்மான் இந்த பாடலுக்கு கோரஸ் வேண்டாம் என சொல்லவே, கண்டிப்பாக கோரஸ் வேண்டும் என விக்ரமன் பிடிவாதமாக இருந்துள்ளார். சரியென்று கோரஸ் கம்போஸ் பண்ணி கோரஸ் பாடும் கலைஞர்களை புக் பண்ண சொல்லியுள்ளார் ரஹ்மான். ஆனால் அன்றைக்கு பார்த்து எல்லா கோரஸ் கலைஞர்களும் பிஸி.

உடனே ரஹ்மான் வீட்டில் அன்று வேலை செய்தவர்களை எல்லாம் வரவழைத்து கோரஸ் ஒன்றை சொல்லிக் கொடுத்து அதைப் போலவே பாட சொல்லியுள்ளார். அவர்களும் ஒருமுறை பாட அதை ரெக்கார்ட் செய்து நான்கு இடத்தில் வெவ்வேறு விதமாக பயன்படுத்தினாராம். இப்போது கேட்டாலும் அந்த கோரஸ் தொழில் முறை கலைஞர்கள் பாடியது போலவே இருக்கும்.

இந்த தகவலை அந்த படத்தில் புரொடக்‌ஷன் மேனேஜராக பணியாற்றிய பாவா லட்சுமணன் ஒரு நேர்காணலில் பகிர்ந்துள்ளார். மேலும் அவர் “ரஹ்மானின் அப்போது அந்த துணிச்சல் இருந்தது. சும்மாவெல்லாம் அவர் ஆஸ்கர் வரை செல்லவில்லை” என்று கூறியுள்ளார்.