வெனிசுலாவில் ஏற்பட்ட சக்திவாய்ந்த நிலநடுக்கத்தின் இடிபாடுகளுக்குள் சிக்கி, 5 நாட்களுக்குப் பிறகு உயிருடன் மீட்கப்பட்ட ‘கிஸெல்’ என்ற சிறிய நாய் குட்டி, தற்போது உலகளவில் ஒரு நம்பிக்கையின் அடையாளமாக மாறியுள்ளது. வெனிசுலாவில் 7.2 மற்றும் 7.5 ரிக்டர் அளவில் அடுத்தடுத்து நிகழ்ந்த நிலநடுக்கங்களால் ஆயிரத்திற்கும் மேற்பட்டோர் உயிரிழந்து, பெரும் சேதம் ஏற்பட்டுள்ள சூழலில், இந்த மீட்புப் பணி அங்கிருந்த மீட்புக் குழுவினருக்கு பெரும் உத்வேகத்தைத் தந்துள்ளது.
வெனிசுலாவின் கராபல்லேடா பகுதியில் உள்ள குடியிருப்பு வளாகத்தின் இடிபாடுகளில் சுமார் 5 மணி நேரப் போராட்டத்திற்குப் பிறகு எல் சால்வடார் நாட்டைச் சேர்ந்த மீட்புக் குழுவினர் இந்த நாய் குட்டியைப் பத்திரமாக மீட்டனர். இடிபாடுகளில் இருந்து வெளியே கொண்டு வரப்பட்ட உடனே, அந்த நாய் குட்டி தன் நன்றியுணர்வை வெளிப்படுத்தும் விதமாக மீட்புப் பணியாளரின் முகத்தை நக்கியும், வாலை இடைவிடாது ஆட்டியும் மகிழ்ச்சியைக் கொண்டாடியது.
இந்த நெகிழ்ச்சியான மீட்பு வீடியோவை எல் சால்வடார் அதிபர் நயிப் புகேலே தனது சமூக வலைத்தள பக்கத்தில் பகிர்ந்துள்ளார். மேலும், அந்த நாய் குட்டியின் உரிமையாளர்கள் யாராவது இருந்தால், தகுந்த புகைப்பட ஆதாரங்களுடன் வந்து அதனை மீட்டுச் செல்லலாம் என்றும் அவர் தெரிவித்துள்ளார். இந்த இக்கட்டான பேரிடர் காலத்திலும் நன்றியுணர்வை வெளிப்படுத்திய கிஸெல்லின் வீடியோ இணையத்தில் பல மில்லியன் கணக்கான இதயங்களை நெகிழச் செய்து வைரலாகி வருகிறது.