சேலம் மாவட்டம் ஆத்தூர் அருகே உள்ள ஜோதி நகர் பகுதியைச் சேர்ந்த 14 வயது பள்ளி மாணவன் ஒருவர், செல்போன் பயன்பாட்டினால் ஏற்பட்ட விபரீதத்தால் தனது உயிரை மாய்த்துக்கொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது. சேரு மற்றும் ஹசீனா தம்பதியரின் மகனான ரியாஸ்கான், அப்பகுதியில் உள்ள அரசு உதவிபெறும் பள்ளி ஒன்றில் பத்தாம் வகுப்பு பயின்று வந்துள்ளார்.
பள்ளி முடிந்து வீட்டிற்கு வந்தவுடனும், விடுமுறை நாட்களிலும் படிப்பில் சிறிதும் கவனம் செலுத்தாமல், இந்த சிறுவன் எப்போதும் செல்போனிலேயே மூழ்கிக்கிடந்ததாகக் கூறப்படுகிறது. இந்த அதீத செல்போன் மோகத்தால், அவரது பெற்றோர் அடிக்கடி அவரை எச்சரித்து வந்துள்ளனர். சம்பவத்தன்று மாலையில் வழக்கம்போல் நீண்டநேரமாக செல்போனைப் பார்த்துக்கொண்டிருந்த சிறுவனை, அவரது தாய் செல்போன் பயன்படுத்தக்கூடாது என கடுமையாகக் கண்டித்துள்ளார்.
தாயின் இந்த கண்டிப்பால் மிகுந்த மனமுடைந்த அந்த மாணவன், வீட்டில் யாரும் இல்லாத சமயத்தில் தனியறையில் தூக்கிட்டுத் தற்கொலை செய்துகொண்டார். அக்கம்பக்கத்தினர் உதவியுடன் ஆத்தூர் அரசு மருத்துவமனைக்குக் கொண்டு செல்லப்பட்ட நிலையில், அவர் ஏற்கனவே உயிரிழந்துவிட்டதாக மருத்துவர்கள் தெரிவித்தனர். இந்த துயர சம்பவம் குறித்து ஆத்தூர் நகர காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.