இந்திய அரசின் பொதுத்துறை ‘மகாரத்னா’ நிறுவனமான ஆயில் இந்தியா லிமிடெட், அந்தமான் கடற்பகுதியின் ஆழமற்ற ஆய்வு வளையத்தில் புதிதாக இயற்கை எரிவாயு இருப்பதைக் கண்டுபிடித்துள்ளதாக அதிகாரப்பூர்வமாக அறிவித்துள்ளது. திறந்தவெளி உரிமக் கொள்கையின் (OALP) ஒரு பகுதியாக, அந்தமான் தீவுகளின் கிழக்குக் கடற்கரையிலிருந்து சுமார் 15 கிலோமீட்டர் தொலைவில் உள்ள கடல் பகுதியில் ‘விஜயபுரம்-3’ என்ற மூன்றாவது ஆய்வுக்கிணறு தோண்டப்பட்டது. சுமார் 355 மீட்டர் கடல் ஆழத்தில், பூமிக்கு அடியில் 1,900 மீட்டருக்கும் அதிகமான ஆழத்தில் துளையிடப்பட்ட இந்த ஆய்வுக்கிணற்றில் இயற்கை எரிவாயு இருப்பது சோதனையின் மூலம் உறுதிசெய்யப்பட்டுள்ளது.
பங்குச் சந்தைகளுக்கு ஆயில் இந்தியா நிறுவனம் அளித்துள்ள ஒழுங்குமுறை அறிக்கையின்படி, இந்த ஆய்வுக்கிணற்றின் ஆரம்பகட்ட உற்பத்தி சோதனையின்போது உடனடியாக அழுத்தம் அதிகரித்து, தொடர்ச்சியான வாயு உற்பத்தி ஏற்பட்டுள்ளது. துளையிட்ட பிறகு வாயு எரியூட்டப்பட்டுத் தொடர்ச்சியான எரிப்பு (Flaring) காணப்பட்டதாகவும் அந்நிறுவனம் தெரிவித்துள்ளது. தற்போது கண்டுபிடிக்கப்பட்டுள்ள இந்த இயற்கை எரிவாயுவின் கலவை, தரம் மற்றும் வெப்ப மதிப்பைத் துல்லியமாகக் கண்டறிவதற்காக எரிவாயு மாதிரிகள் சேகரிக்கப்பட்டு, ஐசோடோப் ஆய்வுகள் உள்ளிட்ட பல்வேறு அறிவியல் பூர்வமான ஆராய்ச்சிகள் தீவிரமாக நடைபெற்று வருகின்றன.
கடந்த 2025 செப்டம்பரில் இதே பகுதியில் ‘விஜயபுரம்-2’ என்ற இரண்டாவது ஆய்வுக்கிணற்றில் இயற்கை எரிவாயு கண்டறியப்பட்டதைத் தொடர்ந்து, அந்தமான் கடலோரப் பகுதியில் அடுத்தடுத்து உறுதிசெய்யப்பட்ட இரண்டாவது மிகப்பெரிய ஹைட்ரோகார்பன் இருப்பு இதுவாகும். இந்தத் தொகுதியில் இதுவரை தோண்டப்பட்ட மூன்று ஆய்வுக்கிணறுகளில், இரண்டில் ஹைட்ரோகார்பன் இருப்பு கண்டறியப்பட்டுள்ளது. இந்தியாவின் எரிசக்தி தேவையைப் பூர்த்தி செய்வதிலும், எதிர்கால கடல்சார் எரிவாயு ஆய்வு உத்திகளை மேம்படுத்துவதிலும் இக்கண்டுபிடிப்பு ஒரு முக்கிய மைல்கல்லாகப் பார்க்கப்படுகிறது.