மங்களூரு சுருத்கல்லில் உள்ள ‘மங்களூர் ரீஃபைனரி அண்ட் பெட்ரோகெமிக்கல்ஸ் லிமிடெட்’ ஆலையில், உயர் அழுத்த குளிரூட்டும் பிரிப்பான் வெடித்து சிதறியதால் திடீர் தீவிபத்து ஏற்பட்டது. இச்சம்பவம் நிகழ்ந்தவுடன், பாதிக்கப்பட்ட அந்தத் தனிப்பிரிவை MRPL அதிகாரிகள் உடனடியாக தனிமைப்படுத்தி, விரைந்து செயல்பட்டு தீயை முழுமையாகக் கட்டுக்குள் கொண்டுவந்தனர்.
இந்தச் சக்திவாய்ந்த வெடிவிபத்தின் தாக்கம், ஆலையின் அருகில் அமைந்துள்ள ஜோக்கட்டே உள்ளிட்ட குடியிருப்புப் பகுதிகளில் பலத்த அதிர்வுகளை ஏற்படுத்தியது. இதனால் அப்பகுதி மக்கள் நிலநடுக்கம் போன்ற அதிர்வை உணர்ந்து கடும் பீதியடைந்தனர். இந்த திடீர் அதிர்வுகள் அங்குள்ள வீடொன்றில் அமைக்கப்பட்டிருந்த சிசிடிவி கேமராவிலும் பதிவாகியுள்ளது.
வெடிப்புச் சத்தமும் அதிர்வுகளும் மிகத் தீவிரமாக இருந்ததால், சுற்றுவட்டார வீடுகளில் அலமாரிகளில் வைக்கப்பட்டிருந்த பாத்திரங்கள் மற்றும் சமையலறைப் பொருட்கள் கீழே விழுந்து சிதறின. இதனால் அச்சமடைந்த பொதுமக்கள் உடனடியாக வீடுகளை விட்டு வெளியேறி வீதிகளில் தஞ்சம் அடைந்தனர்.