“என் நாயை நீங்க எப்படி அடிக்கலாம்” வளர்ப்பு நாயை அடித்த மாப்பிள்ளை வீட்டார்.. திருமணத்தை அதிரடியாக நிறுத்திய மணப்பெண்… கலவரமாக மாறிய கல்யாண வீடு..!!

உத்தரப் பிரதேச மாநிலம் ஃபதேபூர் மாவட்டத்தில் உள்ள காகா (Khaga) பகுதியில் வளர்ப்பு நாய்க்காகத் திருமணம் நின்ற விசித்திரமான சம்பவம் அரங்கேறியுள்ளது. பிரயாக்ராஜில் இருந்து வந்த மணமகன் வீட்டாரை வரவேற்றுத் திருமணச் சடங்குகள் நடந்து கொண்டிருந்தன. அதிகாலை 4 மணி அளவில் மணமேடையில் சடங்குகள் நடந்து கொண்டிருந்தபோது, மணப்பெண் வளர்த்த நாய் குரைத்துள்ளது. இதனால் ஆத்திரமடைந்த மாப்பிள்ளை தரப்பைச் சேர்ந்த ஒருவர் அந்த நாயை அடித்துள்ளார். இதைக் கண்டு அதிர்ச்சியடைந்த மணப்பெண் வீட்டார் தட்டிக் கேட்க, இரு தரப்புக்கும் இடையே வாக்குவாதம் முற்றி பெரும் கலவரமாக மாறியது.

இந்த மோதலில் இரு தரப்பினரும் நாற்காலிகள் மற்றும் தடிகளால் ஒருவரை ஒருவர் தாக்கி கொண்டனர். இதில் மணப்பெண் தரப்பைச் சேர்ந்த மூவர் பலத்த காயமடைந்தனர். தனது வளர்ப்பு நாயை அடித்தது மட்டுமல்லாமல், தனது குடும்பத்தினரையும் தாக்கிய மாப்பிள்ளை வீட்டாருடன் வாழ முடியாது என மணப்பெண் திருமணத்தை நிறுத்தினார். தகவல் அறிந்து வந்த காவல்துறையினர் இரு தரப்பினரிடமும் பேச்சுவார்த்தை நடத்தினர். இறுதியில், ஒருவருக்கொருவர் கொடுத்த அன்பளிப்புகளைத் திருப்பித் தருவதென முடிவு செய்யப்பட்டு, திருமணம் அதிகாரப்பூர்வமாக ரத்து செய்யப்பட்டது. வளர்ப்பு பிராணி மீதான பாசத்திற்காகப் பெண் ஒருவர் திருமணத்தையே நிறுத்திய இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.