உத்தரப் பிரதேச மாநிலம் முசாபர்நகரின் சாந்தி நகர் பகுதியில், வியாழக்கிழமை காலை சுமார் 9:12 மணியளவில் பெண் ஒருவர் தனது வீட்டின் அருகே நடைபயிற்சி மேற்கொண்டிருந்தார். அப்போது இருசக்கர வாகனத்தில் வந்த இரண்டு மர்ம நபர்களில் ஒருவன் வண்டியை இயக்க நிலையில் வைத்திருக்க, மற்றொருவன் அப்பெண்ணை ரகசியமாகக் கண்காணித்து திடீரெனப் பின்னால் இருந்து வந்து அவரது இரண்டு காதுகளிலிருந்த கம்மல்களையும் கொடூரமாகப் பறித்துச் சென்றுள்ளான். பெண் சத்தமிட்டு அலறியதைக் கேட்டு அக்கம் பக்கத்தினர் ஓடி வருவதற்குள், அந்த நபர்கள் பைக்கில் தப்பிச் சென்றுவிட்டனர்.
பட்டப்பகலில் நடைபெற்ற இந்தத் துணிகரச் சம்பவம் அப்பகுதியில் இருந்த கண்காணிப்புக் கேமராவில் தெளிவாகப் பதிவாகி, தற்போது சமூக வலைதளங்களில் வெளியாகிப் பெரும் அதிர்ச்சியை ஏற்படுத்தியுள்ளது. இச்சம்பவம் தொடர்பாக வழக்குப் பதிவு செய்துள்ள காவல் துறையினர், குற்றவாளிகளை அடையாளம் காணவும் அவர்கள் தப்பிச் சென்ற பாதையைக் கண்டறியவும் 4 தனிப்படைகளை அமைத்து தீவிர விசாரணை நடத்தி வருகின்றனர். மேலும், இதுபோன்ற குற்றங்களில் ஈடுபடுபவர்கள் மீது கடுமையான நடவடிக்கை எடுக்க வேண்டும் என்றும், அப்பகுதியில் போலிஸ் ரோந்துப் பணியை அதிகரிக்க வேண்டும் என்றும் பொதுமக்கள் கோரிக்கை விடுத்துள்ளனர்.