உக்ரைன்-ரஷ்யா போரின் தொடக்கத்தில் இருந்தே, அமெரிக்காவின் கடுமையான பொருளாதாரத் தடைகளையும் எச்சரிக்கைகளையும் மீறி, இந்தியா தனது சொந்த நாட்டின் எரிசக்தி தேவையைக் கருத்தில் கொண்டு ரஷ்யாவிடமிருந்து மானிய விலையில் கச்சா எண்ணெயைப் பெற்று வந்தது. அதிபர் டிரம்ப் தலைமையிலான அமெரிக்க நிர்வாகம், இருதரப்பு வர்த்தக ஒப்பந்தங்களின்போது ரஷ்யாவிடமிருந்து எண்ணெய் வாங்குவதை நிறுத்தாவிட்டால் கூடுதல் வரி விதிக்கப்படும் என மிரட்டியதுடன், அதன்படியே வர்த்தக வரிகளையும் விதித்தது. இதற்குப் பதிலளிக்கும் விதமாக, ரஷ்யாவிடமிருந்து வாங்கும் எண்ணெயின் அளவைப் படிப்படியாகக் குறைத்துக் கொள்வதாக இந்தியா உறுதியளித்திருந்தது.
இந்தச் சூழலில்தான், மேற்கு ஆசிய வளைகுடா நாடுகளில் திடீரென போர் பதற்றம் வெடித்தது. அமெரிக்கா மற்றும் இஸ்ரேலின் கூட்டுத் தாக்குதலுக்குப் பதிலடியாக, ஈரான் வளைகுடா நாடுகள் மீது ஏவுகணைத் தாக்குதல் நடத்தியதுடன், உலகளாவிய எண்ணெய் போக்குவரத்தின் முக்கியப் பாதையான ‘ஹார்முஸ் ஜலசந்தியை’ (Strait of Hormuz) மூடியது. இதனால் இந்தியாவின் வழக்கமான எண்ணெய் இறக்குமதியில் பெரும் சிக்கல் ஏற்பட்டது. இந்த நெருக்கடியைக் கையாள்வதற்காகவே, ரஷ்யாவிடமிருந்து இந்தியா தற்காலிகமாக எண்ணெய் வாங்கிக் கொள்ள அமெரிக்கா சிறப்பு விலக்கு அளித்தது. இருப்பினும், நாட்டில் ஏற்பட்ட எண்ணெய் தட்டுப்பாடு காரணமாகச் சமீபத்தில் பெட்ரோல் மற்றும் டீசல் விலையும் உயர்த்தப்பட்டது.
தற்போது, ரஷ்யாவிடமிருந்து இந்தியா கச்சா எண்ணெய் வாங்குவதற்காக அமெரிக்கா அளித்திருந்த அந்தச் சிறப்பு விலக்குக் காலம் நேற்றுடன் முடிவடைந்துள்ளது. மற்றொரு புறம், வளைகுடா நாடுகளின் பதற்றமான சூழலும், ஹார்முஸ் ஜலசந்தி முடக்கமும் இன்னும் சுமுகமான முடிவுக்கு வரவில்லை. இந்த இக்கட்டான நிலையில், இந்தியாவின் தற்போதைய தேவையை உணர்ந்து அமெரிக்கா மீண்டும் ரஷ்யாவிடமிருந்து எண்ணெய் வாங்க விலக்கு அளிக்குமா அல்லது தனது தடைகளைத் தீவிரப்படுத்துமா என்ற மிகப்பெரிய கேள்விக்குறி எழுந்துள்ளது.
ஒருவேளை அமெரிக்கா விலக்கு அளிக்க மறுத்தால், அதனை எதிர்த்து இந்தியா தொடர்ந்து ரஷ்யாவிடம் இருந்து துணிச்சலாக எண்ணெய் வாங்குமா என்பதும் தற்போதைக்கு மர்மமாகவே உள்ளது. ஒருகால், அமெரிக்காவின் அழுத்தத்திற்குப் பணிந்து ரஷ்யாவிடமிருந்து கச்சா எண்ணெய் கொள்முதல் செய்வதை இந்தியா முழுமையாக நிறுத்தினால், உள்நாட்டில் வரலாறு காணாத அளவில் கடுமையான எண்ணெய் தட்டுப்பாடு ஏற்படும். இதன் நேரடி விளைவாக, பெட்ரோல் மற்றும் டீசல் விலை மேலும் பல மடங்கு உயர்ந்து, நாட்டின் ஒட்டுமொத்தப் பொருளாதாரமும், சாமானிய மக்களின் வாழ்வாதாரமும் கடுமையாகப் பாதிக்கப்படும் அபாயம் உள்ளது.