ஏக்தா கௌசல்யா என்ற பெண் தனது முதல் ரேபிடோ பைக் சவாரியின் போது, பார்த் சமாரியா என்ற ஓட்டுநரைச் சந்தித்தார். அந்த பயணத்தின் போது, பார்த் இந்தியாவைப் பிரதிநிதித்துவப்படுத்திய ஒரு தேசிய அளவிலான விளையாட்டு வீரர் என்பதை ஏக்தா அறிந்துகொண்டார். பார்த் தனது நிதி நெருக்கடியைச் சமாளிக்கவும், தனது விளையாட்டுப் பயணத்தைத் தொடர்ந்து தொடரவும் பகுதி நேரமாக ரேபிடோ பைக் ஓட்டி வந்துள்ளார். பார்த்தின் இந்த அர்ப்பணிப்பு ஏக்தாவைக் கவர்ந்தது.
பயணம் முடிந்த பிறகும் ஏக்தாவால் பார்த்தைப் பற்றிய நினைவுகளை நிறுத்த முடியவில்லை. இதனால் அவரே முதலில் பார்த்திற்கு குறுஞ்செய்தி அனுப்பிப் பேசத் தொடங்கினார். அதன் பிறகு, பார்த்தின் விளையாட்டுப் பயிற்சிகளுக்கும் ஏக்தாவின் நடனப் பயிற்சிகளுக்கும் இடையில் கிடைத்த சிறிய இடைவெளிகளில் இருவரும் அடிக்கடி சந்தித்துக் கொண்டனர். இந்த தொடர் சந்திப்புகள் மற்றும் உரையாடல்கள் நாளடைவில் அவர்களுக்குள் காதலாக மலர்ந்தது.
https://www.instagram.com/reel/DfY3YayoPih/?utm_source=ig_web_button_share_sheet
தற்போது பல வருடங்களுக்குப் பிறகு, இருவரும் தங்களது கனவுத் துறைகளில் பெரும் சாதனை படைத்து வருகின்றனர். பார்த் உலக சாம்பியன்ஷிப் போட்டியில் இந்தியாவைப் பிரதிநிதித்துவப்படுத்தும் அளவிற்கு உயர்ந்துள்ளார்; மறுபுறம் ஏக்தா, ரன்வீர் சிங் போன்ற முன்னணி பாலிவுட் நட்சத்திரங்களுடன் இணைந்து பணியாற்றும் ஒரு பாலிவுட் நடன இயக்குநராக மாறியுள்ளார். தங்களது லட்சியங்களுக்கு ஒருவருக்கொருவர் பக்கபலமாக இருக்கும் இந்த ஜோடியின் கதை இணையத்தில் வைரலாகி வருகிறது.