TRENDING
நடிகர் ஒய்ஜி மகேந்திரனின் சொந்தங்கள், அத்தனை பேருமே திரை பிரபலங்கள்தானா -ரஜினி நெருங்கிய சொந்தமா, தலையே சுத்துதே சாமி
தமிழ் சினிமாவில் 1980, 90களில் பிரபல காமெடி நடிகர்களில் ஒருவராக வலம் வந்தவர் ஒய் ஜி மகேந்திரன். ரஜினி, கமல் என இரண்டு முன்னணி ஹீரோக்களின் படங்களிலும் நடித்திருக்கிறார். சில படங்களில் வில்லன் சைடு ஆட்களிலும் ஒருவராகவும் ஒய்ஜி மகேந்திரன் இருந்திருப்பார். இப்போது சமீபத்தில் கூட வெங்கட்பிரபு இயக்கத்தில் மாநாடு படத்தில் தமிழ்நாடு முதலமைச்சர் பதவிக்கு ஆசைப்படும் கட்சி பொதுச் செயலாளராக ஒரு சிறந்த நடிப்பை வெளிப்படுத்தி இருப்பார் ஒய்ஜி மகேந்திரன்.
நடிகர் ஒய்ஜி மகேந்திரனின் குடும்ப உறவுகள் குறித்து ஒரு ஆய்வு நடத்தினால் அவரது குடும்ப உறவினர்கள் அனைவருமே சினிமா சம்பந்தபட்டவர்களாகவே இருக்கின்றனர். சினிமா பிரபலங்களின் மகனாக, மகளாக, உறவினராக இருக்கின்றனர். ஒய்ஜி மகேந்திரனின் அப்பா ஒய்ஜி பார்த்தசாரதி, அமெச்சூர் நாடக நடிகராக இருந்தவர். நாடகங்களை நடத்தியவர். ஒய்ஜி மகேந்திரன் சினிமாவுக்கு வரும்முன் நிறைய நாடகங்களை நடத்தியவர் என்பதும் கவனிக்கத்தக்கது. ஒய்ஜி பார்த்தசாரதியின் தங்கை வசுந்தரா தேவி. இவர் அந்த காலகட்டத்தில் ஒரு பிரபலமான நடிகையாக இருந்தவர். இவரது மகள் வைஜெயந்தி மாலா, கோலிவுட் முதல் பாலிவுட் வரை கொடி நாட்டிய பிரபல நடிகை.
ஒய்ஜி பார்த்தசாரதியின் மனைவி, அதாவது ஒய்ஜி மகேந்திரன் அம்மா ராஜலட்சுமி, பத்மாஸ்ரீ பள்ளிகளை நிறுவியவர். குமுதம், இந்து நாளிதழ்களில் பணிசெய்த பத்திரிகையாளர். இவரது தாத்தா ரங்காச்சாரியார்தான் இந்திய சினிமாவில் சென்சார் போர்டு என்ற அமைப்பை கொண்டு வந்தவர். ராஜலட்சுமியின் சகோதரர்தான் பிரபல சினிமா தயாரிப்பாளர், கே. பாலாஜி. சிவாஜி, ரஜினி, கமல் படங்களை தயாரித்தவர். கே. பாலாஜி பல படங்களில் நடித்தும் இருக்கிறார். கே பாலாஜியின் மகன் சுரேஷ் பாலாஜி. இவரும் சினிமா தயாரிப்பாளர். கே பாலாஜி மகள் சுசித்ரா, பிரபல மலையாள நடிகர் மோகன்லாலை திருமணம் செய்திருக்கிறார்.
இவர்களது மகன் பிரணவ்தான் பாபநாசம் படத்தின் உதவி இயக்குநர். ஒய்ஜி மகேந்திரனின் மனைவி சுதாவின் தங்கை தான் லதா ரஜினிகாந்த். இவர் ரஜினிகாந்தை திருமணம் செய்திருக்கிறார். லதாவின் தம்பி ரவி ராகவேந்தர் ஒரு நடிகர். விசு படங்களில் நிறைய நடித்திருக்கிறார். இவரது மகன்தான் பிரபல இசையமைப்பாளர் அனிரூத். ரஜினிகாந்த் – லதா தம்பதியின் மகள்களான ஐஸ்வர்யா, நடிகர் தனுஷை திருமணம் செய்திருக்கிறார். ஒய்ஜி மகேந்திரன் மகள் மதுவந்தி, ஜெமினி, சாவித்திரியின் மகள் டாக்டர் சாமுண்டீஸ்வரியின் மகன் அருணை திருமணம் செய்திருக்கிறார். இப்படி உறவு சங்கிலியில் சினிமா சார்ந்த உறவுகள் ஒய்ஜி மகேந்திரனுக்கு நீண்டுகொண்டே போகிறது.
