பீகார் மாநிலம் அவுரங்காபாத் மாவட்டத்தில் உள்ள, தீவிர நக்ஸலைட் பாதிப்புக்குள்ளான தேவ் ஒன்றியத்தின் குண்டா கிராமத்தில் வசிக்கும் லோஹ்ரி பால் என்பவரது குடும்பத்திற்கு, நாடு சுதந்திரமடைந்து 78 ஆண்டுகளுக்குப் பிறகு முதன்முறையாக மின்சார வசதி கிடைத்துள்ளது. பல தசாப்தங்களாக இருளில் மூழ்கியிருந்த இவர்களது வீட்டில் முதல்முறையாக மின்விளக்கு எரிந்தபோது, அந்த ஒட்டுமொத்த குடும்பத்தினரும் ஆனந்தக் கண்ணீர் வடித்த நெகிழ்ச்சியான சம்பவம் அரங்கேறியுள்ளது.
இந்தக் கிராமத்திற்கு முன்பே மின்சார வசதி வந்திருந்தபோதிலும், வறுமை மற்றும் கல்வியறிவின்மை காரணமாக அரசு நடைமுறைகள் தெரியாமல் லோஹ்ரி பாலின் குடும்பத்தால் வீட்டிற்கு மின் இணைப்பு பெற முடியாமல் போனது. தினக்கூலி வேலை செய்து வந்த லோஹ்ரி பால், வயது முதிர்வால் வேலை செய்ய முடியாத நிலையில் ஆடு மேய்த்து சொற்ப வருமானத்தில் குடும்பத்தை நடத்தி வந்துள்ளார். இதனால் இத்தனை ஆண்டுகளாக மின் இணைப்பு என்பது அக்குடும்பத்திற்கு ஒரு எட்டாக்கனவாகவே இருந்து வந்தது.
இந்நிலையில், அண்மையில் உரிய அதிகாரிகளிடம் இதற்காக விண்ணப்பித்த 25 நாட்களிலேயே மின்வாரியத் துறையினர் அக்குடும்பத்தின் நீண்ட காலக் கனவை நனவாக்கியுள்ளனர். அதிகாரிகள் நேரில் வந்து வீட்டில் மின்சார மீட்டரைப் பொருத்தி, சுவிட்சைத் தட்டியவுடன் வீடு முழுவதும் ஒளி வெள்ளம் பரவியது. தலைமுறை தலைமுறையாகத் தங்கள் வாழ்க்கையைச் சூழ்ந்திருந்த இருள் விலகி, வீடு வெளிச்சமடைந்ததைக் கண்ட அக்குடும்பத்தினர் கடவுளுக்கு நன்றி செலுத்தி ஆனந்தக் கண்ணீருடன் நெகிழ்ந்து போயினர். இந்த உணர்ச்சிப்பூர்வமான தருணம் ஒட்டுமொத்த கிராம மக்களையும் நெகிழச் செய்துள்ளது.