“பத்து மணி ஆகியும் ஒருத்தரும் வரல” பணத்துக்காக காத்திருந்து வங்கி வாசலிலேயே பிரிந்த உயிர்… வங்கியின் மெத்தனத்தால் பறிபோன உயிர்.. கதறும் மகன்..!!

உத்தரப் பிரதேச மாநிலம் ஆசம்கரில் நடந்த இந்தத் துயரச் சம்பவம், அரசு அமைப்புகளின் அலட்சியத்தையும் பொறுப்பற்ற தன்மையையும் வெளிச்சம் போட்டுக் காட்டுகிறது.   “மணி பத்தரை ஆகப்போகிறது… ஆனால் வங்கியில் பெரிய அதிகாரிகள் ஒருவரைக் கூட காணவில்லை” – எனத் தன் தந்தையின் சிகிச்சைக்காகப் பணம் எடுக்க வந்த இளைஞன் ஒருவன் விரக்தியில் பேசும் வீடியோ தற்போது வைரலாகி வருகிறது. ஆசம்கரில் வசிக்கும் அந்த இளைஞன், உடல்நலம் பாதிக்கப்பட்ட தனது வயதான தந்தையை அழைத்துக் கொண்டு, அவசரத் தேவைக்காகப் பணம் எடுக்க வங்கிக்கு வந்துள்ளார். ஆனால், வங்கிப் பணியாளர்கள் குறித்த நேரத்திற்கு வராததால், பணத்தைப் பெறுவதில் கடும் தாமதம் ஏற்பட்டுள்ளது.

துரதிர்ஷ்டவசமாக, வங்கியின் வாசலிலேயே அந்த முதியவர் சிகிச்சை பலனின்றி பரிதாபமாக உயிரிழந்தார். தனது தந்தை இறப்பதற்குச் சற்று நேரத்திற்கு முன்பு, அந்த இளைஞன் வங்கியின் காலி இருக்கைகளையும், அதிகாரிகளின் வருகைக்காகக் காத்திருப்பதையும் வீடியோவாகப் பதிவு செய்துள்ளார். ஒரு மனிதனின் உயிர் ஊசலாடிக் கொண்டிருக்கும் போது, அரசு சார்ந்த ஒரு பொதுத்துறை நிறுவனம் இவ்வளவு மெத்தனமாகச் செயல்பட்டது மக்களிடையே பெரும் கொந்தளிப்பை ஏற்படுத்தியுள்ளது.

இது போன்ற பொறுப்பற்ற மற்றும் ஊழல் மலிந்த ஊழியர்கள் மீது அரசு ஏன் இன்னும் கடும் நடவடிக்கை எடுப்பதில்லை என்பதே அனைவரின் கேள்வியாக உள்ளது. ஒரு சாதாரண மனிதனின் அவசரத் தேவைக்குக் கூட உதவாத இந்த அரசு இயந்திரம் எதற்கு என்ற ஆதங்கம் அந்த இளைஞனின் குரலில் அப்பட்டமாகத் தெரிகிறது. பணத்திற்காகக் காத்திருந்த அந்த முதியவர், இறுதியில் மரணத்தைத் தழுவியது நம் நாட்டின் நிர்வாகச் சீர்கேட்டிற்கு ஒரு கறைபடிந்த உதாரணமாக மாறியுள்ளது.