ஆசை காட்டி மோசம் செய்த ஷேர் மார்க்கெட்… மனைவிக்கு கணவன் போட்ட ‘பகீர்’ பிளான்.. ஆனா போலீஸ் என்ட்ரியால் இறுதியில் நடந்த ட்விஸ்ட்..!!!

பங்குச்சந்தையில் முதலீடு செய்வதன் மூலம் குறுகிய காலத்தில் பல மடங்கு பணத்தைச் சம்பாதித்துவிடலாம் என்ற எண்ணம் இன்று பலரிடமும் பரவலாகக் காணப்படுகிறது. ஆனால், பங்குச்சந்தை பற்றிய முறையான புரிதலும் கற்றலும் இல்லாமல் ஆசை காரணமாகப் பல லட்சங்களை முதலீடு செய்பவர்கள், இறுதியில் தங்களின் ஒட்டுமொத்தப் பணத்தையும் இழந்து நஷ்டமடைவதே கசப்பான உண்மையாக உள்ளது. பங்குச்சந்தையில் லாபம் ஈட்டியவர்களை விட, போதிய விழிப்புணர்வு இல்லாததால் பெரும் தொகையை இழந்தவர்களே அதிகம். இந்நிலையில்தான், குஜராத் மாநிலத்தைச் சேர்ந்த ஜிக்னேஷ் என்பவர் பங்குச்சந்தையில் தான் இழந்த பல லட்ச ரூபாய் நஷ்டத்தை ஈடு செய்வதற்காக, தன்னைச் சிலர் கடத்திவிட்டதாகத் தனது மனைவியிடமே நாடகமாடிய விசித்திரமான சம்பவம் அரங்கேறியுள்ளது.

பங்குச்சந்தையில் ஏற்பட்ட பெரும் நஷ்டம் தனது மனைவிக்குத் தெரிந்தால் கோபப்படுவார் என்று பயந்த ஜிக்னேஷ், ஒரு நூதனத் திட்டத்தைத் தீட்டினார். அதன்படி, தன்னை யாரோ ஒரு கும்பல் கடத்திக் கைகளைக் கட்டிப்போட்டிருப்பது போலத் தனது சொந்த மொபைல் போன் மூலமாகவே ஒரு வீடியோவை எடுத்துத் தனது மனைவிக்கு அனுப்பியுள்ளார். மேலும், தன்னை விடுவிக்க வேண்டுமென்றால் 50 லட்சம் ரூபாய் தர வேண்டும் எனக் கடத்தல்காரர்கள் மிரட்டுவதாகவும் நாடகமாடி, அந்தப் பணத்தைக் கொண்டு தனது நஷ்டத்தைச் சரிசெய்ய முயன்றுள்ளார். ஆனால், பதறிப்போன அவரது மனைவி உடனடியாகக் காவல்துறையினரிடம் புகார் அளித்தார். இதையடுத்துப் போலீசார் நடத்திய அதிரடி விசாரணையில், கடத்தல் நாடகம் அம்பலமாகி ஜிக்னேஷ் தனது குற்றத்தை ஒப்புக்கொண்டார்.