Real-Life Heroine..! திருமண விழாவில் திடீர் உடல்நலக்குறைவு… மணப்பெண் செய்த நெகிழ்ச்சி செயல்… இணையதளத்தில் பரவிவரும் காட்சி…!!

கேரள மாநிலம் கண்ணூர் மாவட்டத்தில் உள்ள பனூரில், மருத்துவர்களான ஷிரின் சுபைர் மற்றும் ரிஜாஸ் ஆகியோரின் திருமணம் மிகச் சிறப்பாக நடைபெற்று வந்தது. விழாக்கோலம் பூண்டிருந்த அந்த மண்டபத்தில் விருந்து பரிமாறும் பணியில் ஈடுபட்டிருந்த இரண்டு பெண்களுக்கு எதிர்பாராத விதமாக திடீர் உடல்நலக் குறைவு ஏற்பட்டது. ஒரு பெண்ணுக்கு மூக்கிலிருந்து ரத்தம் வழியத் தொடங்கிய நிலையில், மற்றொரு பெண் தலைசுற்றி மயங்கி விழுந்தார். மணப்பெண் ஒரு மருத்துவர் என்பதை நன்கு அறிந்திருந்த உறவினர்கள், உடனடியாக இந்த அவசரத் தகவலை அவரிடம் தெரிவித்தனர்.

இதைக் கேள்விப்பட்டதும் சற்றும் தாமதிக்காத ஷிரின், தனது திருமண சடங்குகளைத் தற்காலிகமாக ஒத்திவைத்துவிட்டு, மணக்கோலத்திலேயே விரைந்து சென்று அவர்களுக்கு முதலுதவி அளித்தார். மூக்கில் ரத்தம் வடிந்த பெண்ணை முன்பக்கமாகச் சாய்த்து அமர வைத்து, ரத்தக் கசிவை நிறுத்தத் தேவையான வழிமுறைகளைச் செய்தார். அதேபோல, மயங்கிய பெண்ணை தரையில் படுக்க வைத்து, அவரது கால்களை சற்று உயர்த்தி ரத்த ஓட்டத்தைச் சீராக்கினார். அதன்பிறகு அவர்களை மேல்சிகிச்சைக்காக மருத்துவமனைக்குச் செல்லும்படி அறிவுறுத்தினார். அவசர சிகிச்சை பிரிவில் முதுநிலை மருத்துவம் பயின்று வரும் ஷிரின், ஆபத்தான நேரத்தில் உதவுவது தனது இயல்பான கடமை என்று நெகிழ்ச்சியாகக் குறிப்பிட்டார். இவரது கணவர் ரிஜாஸ் எலும்பியல் துறையில் மேற்படிப்பு படித்து வருகிறார் என்பது கூடுதல் சிறப்பாகும்.