நடுங்கும் கைகள்… யாரையும் எதிர்பார்க்காத 103 வயது வைராக்கியம்… பல்கலைக்கழக வளாகத்தில் டீக்கடை நடத்தும் பாட்டி.. இந்த வீடீயோவை பாருங்க…!!

குஜராத் மாநிலம் வதோதராவில் உள்ள மகாராஜா சாயாஜிராவ் பல்கலைக்கழகத்தின் (MSU) நுண்கலைத் துறைக்கு அருகில், 103 வயதான காசிபா என்ற மூதாட்டி தேநீர் கடை நடத்தி வரும் செய்தி இணையதளங்களில் வைரலாகி பலருக்கும் உத்வேகத்தை அளித்து வருகிறது. பொதுவாக 100 வயதைக் கடந்தவர்கள் ஓய்வெடுக்கும் நிலையில், காசிபா இன்று வரை சுறுசுறுப்பாகத் தேநீர் தயாரிப்பதிலிருந்து, இஞ்சியைத் தட்டுவது வரை அனைத்து வேலைகளையும் தானே செய்து வருகிறார்.

சுமார் 17 ஆண்டுகளுக்கும் மேலாக இப்பகுதியில் தேநீர் கடை நடத்தி வரும் காசிபாவை, அங்கு பயிலும் மாணவர்கள் அன்புடன் ‘காக்கி’ என்று அழைக்கின்றனர். இவரது இஞ்சித் தேநீர் அந்தப் பகுதியில் மிகவும் பிரபலம். சமீபத்தில் சாக்ஷி சிங் என்ற இன்ஸ்டாகிராம் பயனர், காசிபா தேநீர் தயாரிக்கும் வீடியோவை சமூக வலைதளங்களில் பகிர்ந்தார். அதில், முதுமை காரணமாகக் கைகள் நடுக்கத்துடன் இருந்தாலும், தளராத தன்னம்பிக்கையுடன் அவர் வேலை செய்வதைப் பார்த்துப் பலரும் வியந்து பாராட்டி வருகின்றனர்.

யாரையும் எதிர்பார்க்காமல், தனது உழைப்பிலேயே வாழ வேண்டும் என்ற காசிபாவின் வைராக்கியம் இன்றைய தலைமுறைக்கு ஒரு சிறந்த பாடமாக அமைந்துள்ளது. “வயது என்பது வெறும் எண்ணிக்கைதான்” என்பதைத் தனது செயலின் மூலம் அவர் நிரூபித்து வருகிறார். இவரது எளிமையான வாழ்க்கையும், எதையும் எதிர்பார்க்காத உழைப்பும் பலருடைய கண்களில் கண்ணீரை வரவழைத்துள்ளதோடு, வாழ்க்கையின் மீதான நம்பிக்கையை அதிகப்படுத்தியுள்ளன.