தமிழக அரசியலில் ஏற்கனவே திமுக கூட்டணி, அதிமுக கூட்டணி, நாம் தமிழர் கட்சி மற்றும் தமிழக வெற்றிக் கழகம் என நான்கு முனைப் போட்டி உறுதியாகியுள்ள நிலையில், தற்போது சசிகலாவின் இந்தத் திடீர் நகர்வு அரசியல் வட்டாரத்தில் பெரும் பரபரப்பை ஏற்படுத்தியுள்ளது. தனது ஆதரவாளர்களுடன் தீவிர ஆலோசனையில் ஈடுபட்டுள்ள அவர், தனித்துப் போட்டியிடுவது தமிழக அரசியலில் எந்த மாதிரியான தாக்கத்தை ஏற்படுத்தும் என்பது குறித்து கள நிலவரங்களைக் கேட்டறிந்து வருவதாகத் தெரிகிறது. குறிப்பாக, அமமுகவிலிருந்து விலகி அண்மையில் தன்னிடம் இணைந்த ஜீவிதா நாச்சியாரிடம் தேர்தலில் போட்டியிடுவது குறித்து அவர் நேரடியாகக் கேட்டிருப்பது, தனது அணியைப் பலப்படுத்த சசிகலா இப்போதே வியூகம் வகுப்பதைக் காட்டுகிறது.
சசிகலா தனித்துப் போட்டியிடும் பட்சத்தில், அது குறிப்பாக அதிமுகவின் வாக்கு வங்கியில் நேரடி பாதிப்பை ஏற்படுத்த வாய்ப்புள்ளதாக அரசியல் விமர்சகர்கள் கருதுகின்றனர். அதிமுகவின் கோட்டையாகக் கருதப்படும் தென் மாவட்டங்கள் மற்றும் மத்திய மாவட்டங்களில் உள்ள குறிப்பிட்ட சமூக வாக்குகள் சிதறக்கூடும் என்பதால், மற்ற பெரிய கட்சிகள் இதனை உன்னிப்பாகக் கவனித்து வருகின்றன. ஒருபுறம் விஜய் மற்றும் சீமான் போன்றவர்கள் இளம் வாக்காளர்களைக் குறிவைக்கும் வேளையில், சசிகலா தனது ‘தாய் கழக’ விசுவாசிகளைக் கொண்டு களமிறங்கினால், அது வரும் தேர்தலில் பல தொகுதிகளில் வெற்றி தோல்வியைத் தீர்மானிக்கும் காரணியாக மாறக்கூடும்.