ராஜஸ்தான் தலைநகர் ஜெய்ப்பூரின் மான்சரோவர் காவல் எல்லைக்குட்பட்ட குர்ஜார் கி தடி, சாந்தி நகர் பகுதியில் முட்டை கீழே விழுந்த விவகாரத்தில் ஏற்பட்ட சாதாரணத் தகராறு கொலையில் முடிந்துள்ளது. செவ்வாய்க்கிழமை மாலை, ஒருவர் முட்டைகளை எடுத்துச் சென்றபோது எதிரே வந்த நபருடன் மோதியதால் முட்டைகள் கீழே விழுந்து உடைந்தன. இந்தச் சிறிய காரணத்திற்காக இரு தரப்பினரிடையே தொடங்கிய வாக்குவாதம், விரைவிலேயே வன்முறை மோதலாக மாறியது.
இந்த மோதலின் போது, ஒரு தரப்பினர் தடிகளுடன் வந்து எதிர்த்தரப்பினர் மீது கொடூரத் தாக்குதல் நடத்தினர். இத்தாக்குதலில் மத்தியப் பிரதேசத்தின் ஷியோபூர் மாவட்டத்தைச் சேர்ந்த பல்வீர் என்ற தொழிலாளி பலத்த காயமடைந்தார். ஜெய்ப்பூரில் வாடகைக்குத் தங்கி கூலி வேலை செய்து வந்த பல்வீருடன் இருந்த மேலும் இரு தோழர்களும் காயமடைந்தனர். அருகில் இருந்தவர்களின் உதவியுடன் மருத்துவமனையில் அனுமதிக்கப்பட்ட பல்வீர், நள்ளிரவில் சிகிச்சை பலனின்றி உயிரிழந்தார்.
இச்சம்பவம் குறித்துப் பலியான பல்வீரின் சகோதரர் அளித்த புகாரின் பேரில் மான்சரோவர் காவல்துறையினர் வழக்குப் பதிவு செய்தனர். விரைந்து நடவடிக்கை எடுத்த காவல்துறையினர், தாக்குதலில் ஈடுபட்ட ஒரு சிறுவன் உட்பட 4 பேரைப் பிடித்து விசாரணை நடத்தி வருகின்றனர். மேலும், அசம்பாவிதங்களைத் தவிர்க்க அப்பகுதியில் கூடுதல் காவல்துறையினர் பாதுகாப்புப் பணியில் ஈடுபடுத்தப்பட்டுள்ளனர்.