பீகார் மாநிலம் போஜ்பூரில் திருமண மேடையில் மணமகன் காத்திருக்க, மணப்பெண் தனது குடும்பத்தாருடன் திருமணத்தை புறக்கணித்து வெளியேறிய சம்பவம் பெரும் பரபரப்பை ஏற்படுத்தியுள்ளது. 22 வயதான அந்தப் பெண்ணிற்கு, 36 வயதுடைய ஆணுடன் சில மாதங்களுக்கு முன்பு திருமணம் நிச்சயிக்கப்பட்டது.
மேலும் மணமகனை நேரில் பார்த்த மணப்பெண், “அவர் பார்ப்பதற்கு எனது சித்தப்பா அல்லது பெரியப்பாவைப் போல வயதானவராகத் தெரிகிறார் என் உயிரே போனாலும் அவரைத் திருமணம் செய்து கொள்ள மாட்டேன்” எனக் கூறி பாதியிலேயே வெளியேறினார். மணமகன் வீட்டார் எவ்வளவோ சமாதானம் செய்தும், அந்தப் பெண் தனது முடிவில் உறுதியாக இருந்து அங்கிருந்து கிளம்பினார். மறுபுறம், திருமண உடையில் மேடையில் அமர்ந்திருந்த மணமகன் கண்ணீர் மல்க தனது வேதனையை வெளிப்படுத்தினார்.
இந்நிலையில் “இந்தத் திருமணத்தில் விருப்பமில்லை என்றால் அவர் முதலிலேயே மறுத்திருக்கலாம், அதை விடுத்து ஊர் அறிய மேடை வரை வந்த பிறகு இப்படிச் செய்தது எனக்குப் பெரும் அவமானத்தை ஏற்படுத்திவிட்டது” என்று அவர் கதறினார். வயது இடைவெளி காரணமாக ஒரு திருமணம் மேடை வரை வந்து நின்ற இந்தச் சம்பவம், தற்போது அந்தப் பகுதியில் விவாதப் பொருளாக மாறியுள்ளது.