புளோரிடாவின் ஜாக்சன்வில்லில் சாலையோரம் தண்ணீர் விற்றுக் கொண்டிருந்த ஒன்பது வயதுச் சிறுவன், அடையாளம் தெரியாத நபரால் திடீரெனக் காரில் கடத்தப்பட்டான். அதிர்ச்சியடைந்த அந்தப் பிஞ்சு பாலகன், காரின் ஜன்னல் வழியாகக் கண்ணீருடன் உதவி கோரியதை அப்பகுதியைச் சேர்ந்த ஷமீகா டொவெல் கவனித்தார். தாமதிக்காமல் தனது மகனுடன் காரில் ஏறிய அவர், கடத்தல்காரனை விடாமல் விரட்டிச் சென்று, அவன் தப்பியோட முடியாதபடி தனது வாகனத்தைக் கொண்டு பாதையை மறித்து நிறுத்தினார்.
காருக்குள் சிக்கியிருந்த சிறுவனை விடுவிக்க ஷமீகா கதவை ஓங்கி உதைக்க, அக்கம்பக்கத்தினரும் ஒன்று திரண்டு உதவிக்கு விரைந்தனர். அனைவரின் கூட்டு முயற்சியால் கதவு உடைக்கப்பட்டு சிறுவன் காயமின்றிப் பத்திரமாக மீட்கப்பட்டான்; கடத்தல்காரன் போலீசாரிடம் ஒப்படைக்கப்பட்டான். இத்தகைய கொடூர அதிர்ச்சியிலும், பள்ளிச் செலவிற்காகத் தொடர்ந்து உழைப்பேன் என்ற அச்சிறுவனின் மன உறுதியும், ஒரு உயிரைக் காக்க உயிரைப் பணயம் வைத்து களமிறங்கிய ஷமீகாவின் வீரமும் பலரையும் நெகிழச் செய்துள்ளது.