துமக்கூரு மாவட்டம் குனிகல் தாலுகாவில் உள்ள சவுடநாயக்கனபாளையம் கிராமத்தில், பெற்றோருக்கு இடையே ஏற்பட்ட சண்டையைத் தடுக்க முயன்ற 16 வயது சிறுவன் தனது தந்தையாலேயே கொலை செய்யப்பட்ட சம்பவம் ஞாயிற்றுக்கிழமை நிகழ்ந்துள்ளது. உயிரிழந்த சிறுவன் சுனில் என அடையாளம் காணப்பட்டுள்ளார். மதுப்பழக்கத்திற்கு அடிமையான அவரது தந்தை நஞ்சேகவுடா, குடித்துவிட்டு வீட்டிற்கு வந்து தனது மனைவியுடன் அடிக்கடி தகராறில் ஈடுபட்டு வந்துள்ளார். ஏற்கனவே தனது மனைவியைக் கொலை செய்ய முயன்ற வழக்கில் அவர் கைது செய்யப்பட்டு சிறையில் அடைக்கப்பட்டிருந்தவர் என்பது குறிப்பிடத்தக்கது.
ஞாயிற்றுக்கிழமை காலை வழக்கம் போல் நஞ்சேகவுடா தனது மனைவியுடன் தகராறு செய்து அவரைத் தாக்க முயன்றுள்ளார். அப்போது தனது தாயைக் காப்பாற்றுவதற்காக மகன் சுனில் இடையில் புகுந்து தடுத்துள்ளார். இதனால் ஆத்திரமடைந்த நஞ்சேகவுடா, தனது மனைவியை வீட்டை விட்டு வெளியே தள்ளி கதவை உள்பக்கமாகப் பூட்டிக் கொண்டு மகன் மீது தாக்குதல் நடத்தியுள்ளார்.
https://twitter.com/HateDetectors/status/2122253354730479743/video/1
வீட்டிற்குள் இருந்த விவசாயக் கருவியால் சுனிலை அவர் சரமாரியாகத் தாக்கியதில், அந்தச் சிறுவன் சம்பவ இடத்திலேயே பரிதாபமாக உயிரிழந்தார். இந்தச் சம்பவம் குறித்துத் தகவல் அறிந்த குனிகல் காவல்துறையினர் விரைந்து சென்று நஞ்சேகவுடாவைக் கைது செய்து காவலில் எடுத்துள்ளனர். இது தொடர்பாகக் காவல்துறையினர் தொடர்ந்து தீவிர விசாரணை நடத்தி வருகின்றனர்.
