உத்தரப்பிரதேச மாநிலம் லக்னோவில் ஒரே குடும்பத்தைச் சேர்ந்த மூன்று குழந்தைகள் 72 மணி நேரத்திற்குள் மர்மமான முறையில் உயிரிழந்த சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது. மலிஹாபாத் பகுதியிலுள்ள கண்ட்சரா கிராமத்தைச் சேர்ந்த ஆஷிஷ் குமார் என்பவரின் குழந்தைகளான மூன்று வயது திவ்யான்ஷ், ஆறு வயது கார்த்திக் மற்றும் ஒன்பது வயது லக்ஷ்மி ஆகியோர் அடுத்தடுத்து உயிரிழந்துள்ளனர். நவம்பர் 9-ஆம் தேதி தொடங்கி 12-ஆம் தேதிக்குள் நிகழ்ந்த இந்தத் தொடர் மரணங்களால் அக்குடும்பத்தினர் மீளாத் துயரத்தில் ஆழ்ந்துள்ளனர்.
உயிரிழந்த மூன்று குழந்தைகளுக்கும் ஆரம்பத்தில் லேசான காய்ச்சல் ஏற்பட்டதாகவும், இறுதி நேரத்தில் மூக்கு மற்றும் வாயிலிருந்து ரத்தம் வடிந்ததாகவும் குடும்பத்தினர் தெரிவித்துள்ளனர். இதில் ஒன்பது வயது சிறுமி லக்ஷ்மிக்கு நடத்தப்பட்ட மருத்துவப் பரிசோதனையில் டெங்கு, மலேரியா அல்லது டைபாய்டு ஆகியவை இல்லை என்பது உறுதி செய்யப்பட்டுள்ளது. இருப்பினும், அவரது நுரையீரலில் கடுமையான நிமோனியா பாதிப்பு இருந்ததும், உணவில் விஷம் கலந்திருக்க வாய்ப்புள்ளதா என்ற கோணத்தில் மருத்துவர்கள் சந்தேகிப்பதும் தெரியவந்துள்ளது.
இந்தச் சம்பவத்தின் தீவிரத்தைக் கருத்தில் கொண்டு, தலைமை மருத்துவ அதிகாரி டாக்டர் என்.பி. சிங் உத்தரவின் பேரில் சுகாதாரத் துறையின் உயர்மட்ட மருத்துவக் குழு சம்பவ இடத்திற்கு விரைந்து விசாரணையைத் தொடங்கியுள்ளது. சிறுமியின் உடல் பிரேதப் பரிசோதனைக்காக அனுப்பப்பட்டுள்ள நிலையில், அதன் அறிக்கை வந்த பிறகே மரணத்திற்கான உண்மையான காரணம் தெரியவரும் என அதிகாரிகள் தெரிவித்துள்ளனர். மேலும், கிராமத்தில் தொற்றுநோய் ஏதேனும் பரவியுள்ளதா என்பது குறித்தும் சுகாதாரத் துறையினர் தீவிரமாகக் கண்காணித்து வருகின்றனர்.