குர்கானின் துவாரகா விரைவுச்சாலையில், தீபாவளி பண்டிகையின் போது ஓடும் காரில் இருந்து நபர் ஒருவர் ஆபத்தான முறையில் வானவேடிக்கை பட்டாசுகளை வெடித்த வீடியோ சமூக ஊடகங்களில் வைரலாகி பெரும் பரபரப்பை ஏற்படுத்தியுள்ளது. அந்த கார் வேகமாக முன்னோக்கிச் செல்லும்போது, அதிலிருந்து பட்டாசுகள் காற்றில் வெடித்துச் சிதறுவது அந்த வீடியோவில் பதிவாகியுள்ளது. பொதுச் சாலையில் மற்ற வாகன ஓட்டிகளின் பாதுகாப்பைக் கருத்தில் கொள்ளாமல் செய்யப்பட்ட இந்த பொறுப்பற்ற செயல், பெரும் ஆபத்தை விளைவிக்கும் வகையில் அமைந்துள்ளது.
பண்டிகைக் காலத்தில் சாலையில் போக்குவரத்து அதிகமாக இருக்கும் வேளையில், பொது வழிகளில் இது போன்ற சாகசங்களில் ஈடுபடுவது கடுமையான விபத்துகளுக்கு வழிவகுக்கும் என்று கவலை தெரிவிக்கப்பட்டுள்ளது. ஓடும் வாகனத்திலிருந்து பட்டாசு வெடிப்பது வாகனக் கட்டுப்பாட்டை இழக்கச் செய்யவும், மற்ற ஓட்டுநர்களின் கவனத்தை சிதறடிக்கவும், பாதசாரிகள் மற்றும் பிற பயணிகளுக்கு கடுமையான தீக்காயங்கள் அல்லது பாதிப்புகளை ஏற்படுத்தவும் கூடும் என எச்சரிக்கப்படுகிறது.
இந்த வீடியோவைக் கண்ட இணையவாசிகள் தங்களது கடும் கண்டனங்களை சமூக வலைத்தளங்களில் பதிவு செய்து வருகின்றனர். “சில நொடிகள் பந்தா காட்டுவதற்காக மற்றவர்களின் முழு வாழ்க்கையையும் பணயம் வைக்கக் கூடாது” என்றும், “இது போன்ற முட்டாள்தனமான செயல்கள் அப்பாவி உயிர்களை ஆபத்தில் ஆழ்த்துகின்றன” என்றும் பயனர்கள் தங்களது குமுறல்களை வெளிப்படுத்தியுள்ளனர். மேலும், பண்டிகை காலங்களில் போக்குவரத்து விதிகளை இன்னும் கடுமையாக அமல்படுத்த வேண்டும் என்ற கோரிக்கையையும் இந்த சம்பவம் மீண்டும் எழுப்பியுள்ளது.