அன்றாடப் பிழைப்புக்காகக் காட்டின் ஓரத்திலுள்ள நீர்நிலைகளில் தாமரை இலையையும் பூவையும் பறித்த ஓர் எளிய கிராமத்து மனிதருக்கு, காடுகளைப் பாதுகாப்பதாகக் கூறும் வனத்துறை ரூ.1.5 லட்சம் அபராதம் விதித்திருப்பது சாமானிய மக்கள் மீது காட்டப்படும் அதிகாரத்தின் கோர முகமாகும். சுற்றுச்சூழல் விதிகள் என்ற பெயரில், இயற்கையோடு இயைந்து வாழும் அடித்தட்டு மக்களின் வாழ்வாதாரத்தை நசுக்கும் இத்தகைய கெடுபிடிகள், அதிகார வர்க்கத்தின் விசுவாசம் எப்போதும் அதிகாரமற்ற எளிய மனிதர்களுக்கு எதிராக மட்டுமே பாய்கிறது என்பதை வெளிச்சம் போட்டுக் காட்டுகின்றன.
அதே கன்னியாகுமரி மாவட்டத்தில், பல நூறு ஏக்கர் இயற்கை மலைகளும் கனிம வளங்களும் இரவு பகலாக வெட்டிப் பிளக்கப்பட்டு, சட்டவிரோதமாக எல்லை கடந்து அண்டை மாநிலத்திற்கு லாரிகளில் கடத்தப்பட்டபோது இதே அதிகாரிகள் வேடிக்கை மட்டுமே பார்த்துக் கொண்டிருந்தனர். பேராசை பிடித்த பெரும் முதலாளிகளும் மாஃபியாக்களும் இயற்கையையே அழித்துத் தின்றபோது மௌனமாக இருந்துவிட்டு, கையில் சில தாமரை இலைகளை மட்டுமே சுமந்த ஏழைக்கு லட்சங்களில் அபராதம் விதிக்கும் இந்த இரட்டை வேடம், சட்டமும் நிர்வாகமும் யாருக்காக வேலை செய்கின்றன என்ற ஆழமான கேள்வியையும் மக்கள் மத்தியில் பெருங்கொந்தளிப்பையும் எழுப்பியுள்ளது.