மும்பையில் அமைதியான குடியிருப்புப் பகுதி ஒன்றில், மாற்றியமைக்கப்பட்ட புகைகுழாயுடன் அதிக சத்தத்துடன் பைக் ஓட்டி சென்ற ஆர்யா பாக்டே என்ற இன்ஸ்டாகிராம் பைக் ரைடரை, அங்கே நடைப்பயிற்சி மேற்கொண்டிருந்த குடியிருப்புவாசி ஒருவர் தடுத்து நிறுத்திக் கேள்வி எழுப்பிய வீடியோ இணையத்தில் வைரலாகி வருகிறது. தான் வீடியோ எடுக்கப்படுவதைக் கண்டு பைக்கை யூ-டர்ன் எடுத்து வந்து கேட்ட ரைடரிடம், “உங்கள் பைக் சத்தம் இந்த பகுதியில் உள்ள மக்களுக்குப் பெரும் இடையூறாக இருக்கிறது, சைலன்சர் இல்லையா?” என அந்த நபர் அமைதியாகச் சுட்டிக்காட்டினார்.
https://www.instagram.com/reel/DeMQoq2Mqki/?utm_source=ig_web_copy_link&exln=NTc4MTIwNjQ2YQ==
“ஆம், சத்தம் கொஞ்சம் அதிகம் தான்” என்பதை உடனடியாக ஒப்புக்கொண்ட பைக் ரைடர், குடியிருப்புவாசியின் நியாயமான கோரிக்கையை ஏற்று இனி அந்தப் பகுதியில் பைக் ஓட்ட மாட்டேன் என வாக்குறுதி அளித்துவிட்டுத் திரும்பிச் சென்றார். அத்துடன் தனது வீடியோ மூலம் பார்வையாளர்களிடமும் மன்னிப்பு கேட்டுக் கொண்டார். எவ்விதக் கூச்சலும் வாக்குவாதமும் இன்றி, நாகரீகமான முறையில் சமூகப் பொறுப்புணர்வோடு பேசிப் பிரச்சினையைத் தீர்த்துக் கொண்ட இருவரின் அணுகுமுறையையும் நெட்டிசன்கள் வெகுவாகப் பாராட்டி வருகின்றனர்.