மேற்கு டெல்லியின் கீர்த்தி நகர் பகுதியில் வெள்ளிக்கிழமை காலை சாலையில் நடந்து சென்றுகொண்டிருந்த முதிய தம்பதியினர் மீது எஸ்.யு.வி கார் ஒன்று மோதி பயங்கர விபத்து ஏற்பட்டது. இதில் 79 வயதான தயானந்த் தக்ரா மற்றும் அவரது 71 வயது மனைவி குசும் தக்ரா ஆகியோர் பலத்த காயமடைந்தனர். சிசிடிவி காட்சிகளின்படி, காரின் மோதலில் தூக்கி வீசப்பட்டு ரத்த வெள்ளத்தில் சரிந்த இவர்களை அங்கிருந்த பொதுமக்கள் மீட்டு கல்ரா மருத்துவமனையில் அனுமதித்துள்ளனர்; இவர்களின் பிள்ளைகள் அமெரிக்காவில் வசிக்கும் நிலையில், முதியவர்கள் இருவரும் தற்போது தீவிர சிகிச்சை பெற்று வருகின்றனர்.
இந்த விபத்தை ஏற்படுத்திய ஹூண்டாய் கிரெட்டா காரை ஓட்டி வந்த 49 வயதான நவ்லீன் கவுர் என்ற பெண்ணை டெல்லி போலீசார் கைது செய்துள்ளனர். விபத்து நடந்தவுடன் தயக்கத்துடன் காரை விட்டு வெளியே வந்த அந்தப் பெண், காயமடைந்தவர்களைப் பார்த்துவிட்டு மீண்டும் வாகனத்தை எடுத்துக்கொண்டு அங்கிருந்து தப்பிச் சென்றது சிசிடிவி மூலம் தெரியவந்துள்ளது. தற்போது அவரது கார் பறிமுதல் செய்யப்பட்டுள்ள நிலையில், பாரதிய நியாய சன்ஹிதா சட்டத்தின் கீழ் கவனக்குறைவாக வாகனம் ஓட்டி விபத்து ஏற்படுத்தியதற்காக அவர் மீது வழக்குப்பதிவு செய்து போலீசார் விசாரணை நடத்தி வருகின்றனர்.