உத்தரப் பிரதேச மாநிலம் ஹாப்பூர் மாவட்டம் பாபுகர் காவல் நிலைய எல்லைக்குட்பட்ட பகுதியில், இளைஞர் ஒருவரை அறைக்குள் பூட்டி வைத்துத் தாலிபான் பாணியில் கொடூரமாகத் தாக்கிய சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது.
சிறிய அளவிலான வாக்குவாதம் காரணமாகக் கொதித்தெழுந்த 6 பேர்கொண்ட ரவுடி கும்பல் ஒன்று, அந்த இளைஞரை ஒரு அறைக்குள் இழுத்துச் சென்று பூட்டி வைத்துள்ளது. பின்னர் பெல்ட், கைகள் மற்றும் கால்களாலும் அந்த இளைஞரை இரத்தக்களறியாகும் வரை கொடூரமாக அடித்துச் சித்திரவதை செய்துள்ளனர்.
இந்த கொடூரத் தாக்குதல் தொடர்பான வீடியோ சமூக வலைதளங்களில் வெளியாகித் தீயாகப் பரவி வருகிறது. இச்சம்பவம் குறித்து வழக்குப் பதிவு செய்துள்ள ஹாப்பூர் மாவட்ட காவல்துறையினர், வீடியோ காட்சிகளின் அடிப்படையில் தாக்குதலில் ஈடுபட்ட நபர்களைத் தீவிரமாகத் தேடி வருகின்றனர்.
