பெங்களூருவில் இருந்து குருகிராமிற்கு பணி நிமித்தமாக குடிபெயர்ந்த ஆஸ்தா கோயல் என்ற இன்ஸ்டாகிராம் பயனர், இவ்விரு நகரங்களுக்கும் இடையிலான அலுவலக கலாச்சார வேறுபாடுகள் குறித்துப் பேசிய வீடியோ சமூக வலைதளங்களில் வைரலாகி வருகிறது. பெங்களூருவில் ஊழியர்கள் தங்களுக்கு விருப்பமான மற்றும் சௌகரியமான ஆடைகளை அணிய முழு சுதந்திரம் இருந்தது என்றும், ஆனால் குருகிராமில் முறையான ஆடைக் கட்டுப்பாடு கண்டிப்பாகப் பின்பற்றப்பட வேண்டியுள்ளது என்றும் அவர் குறிப்பிட்டுள்ளார்.
மேலும், பெங்களூரு அலுவலகத்திற்குத் தனது செல்லப் பிராணியான பூனையை அழைத்துச் செல்ல அனுமதி இருந்ததாகவும், ஆனால் குருகிராம் அலுவலகத்தில் அதற்கு அனுமதி இல்லாததால் பூனையை வீட்டில் விட்டுவிட்டு வருவது தமக்கு மிகுந்த வருத்தத்தைத் தருவதாகவும் அவர் தெரிவித்துள்ளார். ஆடை சுதந்திரம் மற்றும் செல்லப் பிராணிகளுக்கு உகந்த சூழல் ஆகிய விஷயங்களில் பெங்களூரு அலுவலக கலாச்சாரமே சிறந்தது என அவர் அந்த வீடியோவில் ஆதங்கத்துடன் பகிர்ந்துள்ளார்.
இந்த வீடியோ இணையத்தில் பெரும் விவாதத்தைக் கிளப்பியுள்ளது. சிலர் நிறுவனத்திற்கு ஏற்ப ஆடைக் கட்டுப்பாடு மாறுபடும் என்றும், குருகிராமிலும் கட்டுப்பாடுகள் இல்லாத அலுவலகங்கள் உள்ளன என்றும் கருத்து தெரிவித்துள்ளனர். அதேவேளையில், வடஇந்தியாவைச் சேர்ந்த பல பயனர்களும் வேலை கலாச்சாரம், கூலான மனிதர்கள் மற்றும் சுதந்திரமான சூழல் ஆகியவற்றைப் பொறுத்தவரை பெங்களூருவே மிகச் சிறந்தது என ஆதரவு தெரிவித்து வருகின்றனர்.