மகாராஷ்டிர மாநிலம் சத்தாரா மாவட்டத்திற்குட்பட்ட மஸ்வத் பகுதியில், சட்டவிரோத மணல் கடத்தலைத் தடுக்க முயன்ற காவலரை லாரியிலேயே சுமார் ஒரு கிலோமீட்டர் தூரம் இழுத்துச் சென்ற நெஞ்சை பதறவைக்கும் சம்பவம் பெரும் பரபரப்பை ஏற்படுத்தியுள்ளது. அப்பகுதியில் வழக்கமான ரோந்துப் பணியில் ஈடுபட்டிருந்த காவலர் மகாவீர் கோகரே, பதிவு எண் இன்றி சந்தேகத்திற்கிடமான வகையில் வந்த டம்ப்பர் லாரி ஒன்றை மறித்துச் சோதனையிட்டார். அப்போது, அதில் எவ்வித அனுமதியுமின்றி சட்டவிரோதமாக வெட்டி எடுக்கப்பட்ட மணல் ஏற்றி வரப்பட்டது கண்டுபிடிக்கப்பட்டது.
மணல் கடத்தலுக்கான உரிய அனுமதிப் பத்திரத்தைக் காவலர் கேட்டபோது, லாரி ஓட்டுநர் வாக்குவாதத்தில் ஈடுபட்டுள்ளார். திடீரென வாகனத்தை இயக்கித் தப்பியோட முயன்றபோது, காவலர் கோகரே லாரியின் கதவைப் பிடித்துத் தடுக்க முற்பட்டார். ஆனால், லாரியை நிறுத்தாத ஓட்டுநர், வேகத்தை அதிகரித்துச் சாலையிலேயே காவலரை ஒரு கிலோமீட்டர் தூரம் இழுத்துச் சென்றுள்ளார். இந்தத் தாக்குதலில் தீவிர காயமடைந்த காவலர் கோகரேவை, அப்பகுதி மக்களும் சக காவலர்களும் மீட்டு உடனடியாக அருகில் உள்ள மருத்துவமனையில் அனுமதித்தனர்.
மருத்துவமனையில் சுயநினைவு திரும்பியதும் காவலர் அளித்த வாக்குமூலத்தின் அடிப்படையில், மஸ்வத் காவல்துறையினர் வழக்குப் பதிவு செய்து தீவிர தேடுதல் வேட்டையில் ஈடுபட்டனர். இதில் தொடர்புடைய முக்கியக் குற்றவாளிகள் இருவரைப் காவல்துறையினர் விரைந்து கைது செய்தனர். மேலும், இச்சம்பவத்தின் பின்னணியில் செயல்படும் மணல் மாஃபியா கும்பல் மற்றும் லாரியின் உரிமையாளர் குறித்தும் காவல்துறையினர் தீவிர விசாரணை நடத்தி வருகின்றனர்.