மத்திய கிழக்கு வங்கக் கடலில் நிலவி வந்த ஆழ்ந்த காற்றழுத்தத் தாழ்வுப் பகுதி, தற்போது மேலும் வலுவடைந்து தாழ்வு மண்டலமாக மாறியுள்ளதாக இந்திய வானிலை ஆய்வு மையம் (IMD) தெரிவித்துள்ளது. இந்த அமைப்பு வடமேற்கு திசையில் நகர்ந்து, வரும் செப்டம்பர் 24-ஆம் தேதி அதிகாலை வேளையில் வடக்கு ஆந்திரா மற்றும் தெற்கு ஒடிசா கடற்கரை இடைப்பட்ட பகுதியில் கரையை கடக்கக்கூடும் என்று கணிக்கப்பட்டுள்ளது. இதன் காரணமாக வங்கக் கடல் பகுதி கொந்தளிப்புடன் காணப்படும் என்பதால் மீனவர்கள் ஆழ்கடலுக்குச் செல்ல வேண்டாம் என்றும் எச்சரிக்கப்பட்டுள்ளது.
அடுத்த 24 மணி நேரத்தில் இந்த அமைப்பு புயலுக்கு முந்தைய நிலைக்கு மேலும் தீவிரமடைய உள்ளதால், அதன் தாக்கமாகத் தமிழ்நாட்டின் 22-க்கும் மேற்பட்ட மாவட்டங்களில் இடி, மின்னலுடன் கூடிய கனமழை பெய்ய வாய்ப்புள்ளது. பருவமழை தீவிரமடைந்து வரும் சூழலில், பெரும்பாலான மாவட்டங்களில் குளிர்ந்த காற்றும், மேகமூட்டமும் நிலவி வருவதோடு, பல இடங்களில் மிதமான மழை பெய்யத் தொடங்கியுள்ளது. பொதுமக்கள் தேவையான முன்னெச்சரிக்கை நடவடிக்கைகளுடன் இருக்குமாறு அறிவுறுத்தப்பட்டுள்ள நிலையில், உங்கள் பகுதியில் மழை பெய்யத் தொடங்கிவிட்டதா?