உத்தரப் பிரதேச மாநிலம் பாண்டா மாவட்டம் கமாசின் காவல் நிலைய எல்லைக்குட்பட்ட ஓஜானகர் பகுதியில் இதிஹாசமான ஒரு கொடூர சம்பவம் நடந்துள்ளது. நிலம் மற்றும் சொத்து தகராறு காரணமாக, 85 வயதான சங்கர் குப்தா என்பவரை அவரது இளைய மகன் குஷால் குப்தா இரக்கமின்றி கொடூரமாகத் தாக்கியுள்ளார். எலும்பும் தோலுமாக காட்சியளிக்கும் முதியவர் இரக்கமின்றி தாக்கப்படும் இந்த நெஞ்சை பதறவைக்கும் காணொளி தற்போது சமூக வலைதளங்களில் வேகமாகப் பரவி வருகிறது.
சொத்துக்காகப் பெற்ற தந்தையையே மிருகத்தனமாகத் தாக்கிய இந்தச் சம்பவம் தொடர்பாக, மூத்த மகன் கைலாஷ் காவல்துறை அதிகாரிகளிடம் புகார் அளித்துள்ளார். இருப்பினும், காவல் துறையினர் இந்த விவகாரத்தைக் கண்டுகொள்ளாமல் அலட்சியமாக இருந்ததாக அவர் குற்றம் சாட்டியுள்ளார். இந்த அலட்சியப்போக்கு அப்பகுதி மக்களிடையே பெரும் அதிர்ச்சியையும் கொந்தளிப்பையும் ஏற்படுத்தியுள்ளது.
https://twitter.com/ashishpaswan0/status/2101320593610338409/video/1
மகனின் கொடூரத் தாக்குதலால் பலத்த காயமடைந்த சங்கர் குப்தாவின் உடல்நிலை மிகவும் கவலைக்கிடமாக மாறியுள்ளது. தற்போது அவர் தீவிர சிகிச்சைக்காக மருத்துவமனையில் அனுமதிக்கப்பட்டு, ஆபத்தான நிலையில் சிகிச்சைப் பெற்று வருகிறார். சமூக வலைதளங்களில் பரவி வரும் இந்த வீடியோ வைரலானதைத் தொடர்ந்து, சம்பந்தப்பட்ட நபர் மீது கடுமையான நடவடிக்கை எடுக்க வேண்டும் என இணையவாசிகள் கோரிக்கை விடுத்து வருகின்றனர்.