தலைநகர் டெல்லியின் திக்ரி பகுதியில், வெள்ளிக்கிழமை மாலை நேரத்தில் வீட்டில் சமைப்பது தொடர்பாகக் கணவன் கமலேஷிற்கும், அவரது 31 வயதான மனைவி பூனமிற்கும் இடையே திடீரெனக் கடுமையான வாக்குவாதம் வெடித்துள்ளது.
சண்டை முற்றியதில் ஆத்திரமடைந்த கமலேஷ், தான் வைத்திருந்த துப்பாக்கியை எடுத்து மனைவி பூனமை சுட்டுள்ளார். இதில் ரத்த வெள்ளத்தில் சுருண்டு விழுந்த பூனம் சம்பவ இடத்திலேயே பரிதாபமாக உயிரிழந்தார். கொலையை மறைப்பதற்காக, தனது மனைவி தானே துப்பாக்கியால் சுட்டுத் தற்கொலை செய்து கொண்டதாகக் கூறி அக்கம் பக்கத்தினரிடம் கமலேஷ் நாடகமாடியுள்ளார்.
இருப்பினும், அவரது பேச்சில் சந்தேகமடைந்த உள்ளூர்வாசிகள், தப்பிச்செல்ல முயன்ற கமலேஷை அதிரடியாக மடக்கிப் பிடித்து தர்மஅடி கொடுத்து போலிஸாரிடம் ஒப்படைத்தனர். இச்சம்பவம் தொடர்பாக வழக்குப் பதிவு செய்த டெல்லி போலிஸார், கமலேஷைக் கைது செய்து அவருக்குத் துப்பாக்கி எப்படி கிடைத்தது என்பது குறித்துத் தீவிர விசாரணை நடத்தி வருகின்றனர்.