பெங்களூரில் சட்டக்கல்லூரி மாணவியும், பிட்சா விற்பனை மைய ஊழியருமான 21 வயது அம்ருதா என்பவரைப் பின்னால் இருந்து தாக்கி கத்தியால் குத்தும் சிசிடிவி காட்சிகள் வெளியாகி அதிர்ச்சியை ஏற்படுத்தியுள்ளன. ஜூலை 13 அன்று பணிக்குச் செல்லும் வழியில் தாக்கப்பட்ட அவர், மருத்துவமனையில் அனுமதிக்கப்பட்டு ஜூலை 15 அன்று சிகிச்சை பலனின்றி உயிரிழந்தார். தடுத்து நிறுத்த முயன்ற உள்ளூர்வாசிகளையும் தாக்கிய குற்றவாளியை அப்பகுதி மக்கள் பிடித்து போலீசில் ஒப்படைத்தனர்.
தனுஷ் என்பவருடனான காதலை அம்ருதா அண்மையில் முறித்துக் கொண்டதே இந்தத் தாக்குதலுக்குக் காரணம் எனக் கூறப்படுகிறது. தனுஷிற்கு ஏற்கனவே திருமணமாகி, விவாகரத்தாகி ஒரு குழந்தை இருப்பது அம்ருதாவிற்குத் தெரியவந்ததையடுத்து, அவர் அந்த உறவிலிருந்து விலகியுள்ளார். இதனால் ஆத்திரமடைந்த தனுஷின் தம்பி சூர்யா என்பவரே அம்ருதாவைத் தாக்கியதாகக் காவல் துறையினர் தெரிவிக்கின்றனர்.
https://twitter.com/nextminutenews7/status/2100437522614796720/video/1
இக்கொலை தொடர்பாக சூர்யா மற்றும் தனுஷ் ஆகிய இருவரையும் ஜீவன் பீமா நகர் காவல்துறையினர் கைது செய்துள்ளனர். காதலை நிராகரித்ததால் தான் அம்ருதா கொல்லப்பட்டதாக அவருடைய குடும்பத்தினர் குற்றம் சாட்டுகின்றனர். எனினும், இருவருக்கும் இடையே பணத் தகராறு ஏதேனும் இருந்ததா என்ற கோணத்திலும் காவல் துறையினர் தீவிர விசாரணை மேற்கொண்டு வருகின்றனர்.