ஹரியானா மாநிலம் கர்னாலில் உள்ள வீர் ரைஸ் மில் அருகே டீக்கடை நடத்தி வந்த தேஜ்பீர் சிங் என்பவர் இரும்புக் கம்பியால் தாக்கி கொடூரமாகக் கொலை செய்யப்பட்டுள்ளார். சம்பவத்தன்று அவர் தனது கடையின் தரையைப் பெருக்கிக் கொண்டிருந்தபோது, எதிர்பாராத விதமாக இந்தத் தாக்குதல் நடத்தப்பட்டுள்ளது.
இச்சம்பவம் தொடர்பான சிசிடிவி காட்சிகள் வெளியாகி பெரும் பரபரப்பை ஏற்படுத்தியுள்ளன. தகவலறிந்து சம்பவ இடத்திற்கு விரைந்த காவல்துறையினர், தேஜ்பீர் சிங்கின் உடலைக் கைப்பற்றி பிரேதப் பரிசோதனைக்கு அனுப்பி வைத்தனர்.
இக்கொலை வழக்கு குறித்து வழக்குப் பதிவு செய்துள்ள காவல்துறையினர் தீவிர விசாரணை மேற்கொண்டு வருகின்றனர். தாக்குதலுக்கான காரணம் மற்றும் குற்றவாளிகள் குறித்த கூடுதல் விவரங்கள் விசாரணைக்குப் பிறகே தெரியவரும் என எதிர்பார்க்கப்படுகிறது.