பாஜக தேசியச் செயலாளர் மா. வெங்கடேசன், விடுதலைச் சிறுத்தைகள் கட்சி தலைவர் திருமாவளவன் குறித்துத் தெரிவித்த கருத்தும், அதைத் தொடர்ந்து அவர் அளித்த பேட்டியும் தமிழக அரசியலில் பெரும் விவாதத்தைக் கிளப்பியுள்ளது. கடந்த 2014-ஆம் ஆண்டு பாஜக கூட்டணியில் இடம்பெறவும், மத்திய அமைச்சரவையில் பதவி பெறவும் திருமாவளவன் பேச்சுவார்த்தை நடத்தியதாக மா. வெங்கடேசன் பகிரங்கமாகக் குற்றம் சாட்டியிருந்தார். இச்சூழலில், ஒன்இந்தியா தளத்திற்கு அளித்த சிறப்புப் பேட்டியில், தனது குற்றச்சாட்டிற்கான முழு ஆதாரங்களும் தன்னிடம் இருப்பதாக அவர் மீண்டும் அழுத்தமாகக் கூறியுள்ளார்.
தன் மீதான குற்றச்சாட்டை விசிக தரப்போ அல்லது திருமாவளவனோ இதுவரை அதிகாரப்பூர்வமாக மறுக்கவில்லை என்பதை சுட்டிக்காட்டிய மா. வெங்கடேசன், “தைரியமிருந்தால் திருமாவளவன் இந்த குற்றச்சாட்டை மறுக்கட்டும், 2014-ல் அவர் யாரிடம் பேசினார் என்பதற்கான முழு ஆதாரத்தையும் வெளியிட நான் தயார்” எனச் சவால் விடுத்துள்ளார். மேலும், பாஜகவை தேவையின்றி விமர்சித்தால் மட்டுமே இத்தகைய கடந்தகால அரசியல் தொடர்புகள் மற்றும் மறைக்கப்பட்ட உண்மைகளை வெளிச்சத்திற்கு கொண்டு வர நேரிடும் என்றும் அவர் எச்சரித்துள்ளார்.
தனது பேட்டியில் மதிமுக பொதுச்செயலாளர் வைகோவின் கடந்தகால நிகழ்வு ஒன்றையும் வெங்கடேசன் நினைவுகூர்ந்தார். முன்பு விசிக நிர்வாகிகள் தன் மீது விமர்சனம் வைத்தபோது, அக்கட்சிக்கு ரூ.30 லட்சம் நிதி உதவியளித்த விவகாரத்தை வைகோ சுட்டிக்காட்டிய பின்னரே அவர்கள் அமைதியானதாகக் குறிப்பிட்ட அவர், விசிகவின் கடந்தகால அரசியல் வரலாற்றை அம்பலப்படுத்த வேண்டிய அவசியம் தங்களுக்கு இல்லை என்றாலும், பாஜக மீது வீண்பழி சுமத்தினால் உண்மைகள் வெளிவரும் என்றார்.
அத்துடன், தமிழக வெற்றிக் கழகத் தலைவர் விஜய் குறித்த திருமாவளவனின் நிலைப்பாட்டையும் அவர் காரசாரமாக விமர்சித்தார். விஜய் சனாதன எதிர்ப்பாளர் என்பதால் தான் அவரை ஆதரிப்பதாகத் திருமாவளவன் கூறுவது ஏற்புடையதல்ல எனக் குறிப்பிட்ட அவர், விஜய் எப்போது சனாதனத்திற்கு எதிராகச் செயல்பட்டார் எனக் கேள்வி எழுப்பினார். மேலும், கிருஷ்ண ஜெயந்திக்கு வாழ்த்து தெரிவித்த விஜய் போன்ற ஒருவரை சனாதன எதிர்ப்பாளராகக் சித்தரிப்பது முரண்பாடானது என்றும் மா. வெங்கடேசன் தனது பேட்டியில் தெளிவுபடுத்தியுள்ளார்.