சென்னையில் கஞ்சா போதையில் இருந்த 53 வயது நபர் ஒருவர், மருத்துவமனைக்கு அழைத்துச் செல்லப்பட்டபோது 108 ஆம்புலன்ஸ் ஊழியர்களைத் தாக்கி மருத்துவ உபகரணங்களைச் சேதப்படுத்திய சம்பவம் பரபரப்பை ஏற்படுத்தியுள்ளது. தரமணி பாரதி நகரில் காயங்களுடன் கிடந்த திருவண்ணாமலையைச் சேர்ந்த ராமசாமி என்பவரை மீட்டு சைதாப்பேட்டை அரசு மருத்துவமனைக்கு ஆம்புலன்ஸில் அழைத்துச் சென்றபோது, அவர் ஊழியர் யுவராஜை ஸ்டெதாஸ்கோப்பால் நெரிக்க முயன்றும், டிரைவர் மகேஷை கூர்மையான பொருளால் தாக்கியும் ரகளையில் ஈடுபட்டார்.
வேளச்சேரி காவல்துறையினர் அவரை முழுமையாகக் கட்டுப்படுத்தி, அதிகாலை 1.30 மணியளவில் சைதாப்பேட்டை அரசு மருத்துவமனையில் சேர்த்தனர். ஆனால், அங்கேயும் மருத்துவர்கள், செவிலியர்கள் மற்றும் காவல்துறையினரைத் தாக்க முயற்சித்தார். விசாரணையின்போது, தான் கஞ்சா மற்றும் போதை மாத்திரைகளை விற்க மறுத்ததால் ஒரு கும்பல் தன்னை மிரட்டி கட்டாயப்படுத்தி போதைப்பொருளை உடலில் செலுத்தியதாக ராமசாமி தெரிவித்துள்ளார். அவரது இந்தக் கூற்று குறித்து காவல்துறையினர் தீவிர விசாரணை நடத்தி வருகின்றனர்.
இந்தத் தாக்குதல் சம்பவத்திற்குப் பிறகு ராமசாமி கீழ்பாக்கம் மனநல மருத்துவமனைக்கு மாற்றப்பட்டார். அவர் நடத்திய ரகளையில் ஆம்புலன்ஸின் ஜன்னல்கள், இருக்கைகள் மற்றும் உள்ளே இருந்த மருத்துவ உபகரணங்கள் கடுமையாகச் சேதமடைந்தன. சேதமடைந்த உபகரணங்களின் மதிப்பு சுமார் ரூ 10 லட்சம் வரை இருக்கும் என காவல்துறை தரப்பில் தெரிவிக்கப்பட்டுள்ளது.