2029-ஆம் ஆண்டு மக்களவைத் தேர்தலில் தமிழக வெற்றிக் கழகத்தின் தலைவர் விஜய் பிரதமர் வேட்பாளராக உருவெடுக்கக்கூடும் என்று தமிழக அமைச்சர்கள் தெரிவித்து வரும் கருத்துக்கள், காங்கிரஸ் தலைமையிடையே பெரும் பரபரப்பையும் கலக்கத்தையும் ஏற்படுத்தியுள்ளன. ஒருவேளை தவெக தேசிய அளவில் மூன்றாவது அணியை உருவாக்கி காங்கிரஸுடனான கூட்டணியை முறித்துக் கொண்டால், தமிழகத்தில் வேறு வழியின்றி மீண்டும் அறிவாலயத்தின் கதவுகளையே தட்ட வேண்டிய சூழல் காங்கிரஸுக்கு உருவாகும் என அக்கட்சி கருதுகிறது.
அதேசமயம், தேசிய அளவில் பாஜகவை எதிர்கொள்ள திமுகவுக்கும் ஒரு பலமான பிரதமர் முகம் தேவைப்படும் என்பதால், கடந்தகால கசப்புகளை மறந்து ‘மறப்போம் மன்னிப்போம்’ என்ற தாராள மனப்பான்மையுடன் காங்கிரஸை திமுக மீண்டும் அரவணைத்துக் கொள்ளக் கூடும் என்று அரசியல் விமர்சகர்கள் கணித்து வருகின்றனர்.