தமிழ்நாடு சட்டமன்றத்தில் மக்கள் பிரதிநிதிகள் கலந்துகொண்டு தொகுதிப் பிரச்சினைகள் மற்றும் மக்கள் நல திட்டங்கள் குறித்து விவாதிப்பது பேரவையின் முதன்மைப் பணியாகும். இதற்கெனத் தனியாக மாண்புகளும் மரபுகளும், அவை விதிகளும் வகுக்கப்பட்டு, பதவியேற்பின்போதே உறுப்பினர்களுக்குத் தெளிவாக அறிவுறுத்தப்படுகின்றன. ஆனால், அண்மைக்காலமாகச் சட்டமன்றக் கூட்டத்தொடரின் போது சில உறுப்பினர்கள் பேரவை விதிகளை மீறி செல்போனைப் பயன்படுத்துவது பெரும் விவாதப் பொருளாக மாறியுள்ளது.
சட்டப்பேரவை இயங்கும் நேரங்களில் உறுப்பினர்கள் கைபேசியைப் பயன்படுத்தக் கூடாது என்பது தெளிவான விதியாகும். இருப்பினும், திமுக உறுப்பினர்களான கே.என். நேரு மற்றும் பட்டுக்கோட்டை அண்ணாதுரை ஆகியோர் அவை நடவடிக்கைகளின்போது கைபேசியில் மூழ்கியிருந்த காட்சிகள் இணையத்தில் வெளியாகிப் பொதுமக்கள் மற்றும் சமூக ஆர்வலர்களிடையே கடும் கண்டனங்களை எழுப்பியுள்ளன. நாளொன்றுக்கு லட்சக்கணக்கான ரூபாய் மக்கள் பணம் செலவழிக்கப்பட்டு, ஆண்டிற்குச் சில நாட்களே நடக்கும் சட்டமன்றத்தில், சக உறுப்பினர்கள் பேசுவதைக் கூடக் கவனிக்காமல் பிரதிநிதிகள் இப்படி அலட்சியம் காட்டுவது பொறுப்பற்ற செயலாகும்.
தொகுதிப் பிரச்சினைகளை அமைச்சர்களிடம் எழுப்பித் தீர்வு காண்பதே சவாலாக இருக்கும் சூழலில், மக்கள் பிரதிநிதிகள் அவையின் மாண்பைக் காத்துச் செயல்பட வேண்டியது அவசியமாகும். எனவே, பேரவை விதிகளை அனைத்து உறுப்பினர்களும் கண்டிப்புடன் பின்பற்றுவதை உறுதிசெய்யும் வகையில், சபாநாயகர் ஜே.சி.டி. பிரபாகர் கடுமையான உத்தரவுகளையும் நடவடிக்கைகளையும் பிறப்பிக்க வேண்டும் எனப் பொதுமக்கள் வலியுறுத்துகின்றனர்.