பிரேசிலின் ஆகுவாஸ் லிண்டாஸ் டி கோயாஸ் நகரில், தனது முன்னாள் கணவரால் கடத்தப்பட்டு பல நாட்கள் கொடூரமாக சித்திரவதை செய்யப்பட்ட 24 வயது இளம்பெண் ஒருவரை காவல்துறையினர் அதிரடியாக மீட்டுள்ளனர். எமிலியானே தமாரா நூன்ஸ் கார்வாலோ என்ற அந்த பெண், கடந்த ஆகஸ்ட் 17ஆம் தேதி காணாமல் போன நிலையில், ஐந்து நாட்களுக்குப் பிறகு ஒரு பாழடைந்த வீட்டில் இருந்து மீட்கப்பட்டார். அப்பெண்ணின் அலறல் சத்தம் கேட்டு கதவை உடைத்து உள்ளே நுழைந்த ராணுவ போலீசார், அவர் வாயு முகமூடி அணிவிக்கப்பட்டு, கைகள் மற்றும் கால்கள் சங்கிலியால் படுக்கையோடு கட்டப்பட்ட நிலையில் உயிருக்கு போராடிக்கொண்டிருந்ததை கண்டு அதிர்ச்சியடைந்தனர்.
செவிலியர் துறையில் பணியாற்றும் எமிலியானே, தனது இரண்டு குழந்தைகள் குறித்து பேசுவதற்காக முன்னாள் கணவர் அய்ல்டன் ரோட்ரிக்ஸ் டி சௌசாவை சந்திக்க சென்றபோது இந்த கொடூர சம்பவம் அரங்கேறியுள்ளது. அவரை தாக்கி ரகசிய அறை ஒன்றில் அடைத்து வைத்த அய்ல்டன், தொடர்ந்து அவருக்கு போதை மருந்து செலுத்தி பாலியல் வன்கொடுமை செய்துள்ளார். மீட்கப்படும் போது மூச்சுத்திணறல் மற்றும் ஆக்சிஜன் குறைபாட்டால் எமிலியானே கடுமையாக பாதிக்கப்பட்டிருந்தார். மேலும், அந்த வீட்டில் பதுக்கி வைக்கப்பட்டிருந்த உணவுப் பொருட்களை வைத்துப் பார்க்கும் போது, அவரை இன்னும் பல நாட்கள் அங்கு சிறைவைக்க அந்த நபர் திட்டமிட்டிருந்தது விசாரணையில் அம்பலமானது.
இந்த சம்பவத்தையடுத்து, ஆகஸ்ட் 21 அன்று கைது செய்யப்பட்ட அய்ல்டன் மீது ஆட்கடத்தல், பாலியல் வன்கொடுமை மற்றும் சட்டவிரோதமாக சிறைவைத்தல் உள்ளிட்ட கடுமையான பிரிவுகளின் கீழ் வழக்குப்பதிவு செய்யப்பட்டுள்ளது. கொடூர தாக்குதலுக்கு உள்ளாகி மருத்துவமனையில் சிகிச்சைக்காக அனுமதிக்கப்பட்ட எமிலியானே தற்போது வீடு திரும்பியுள்ளார். சுமார் ஐந்து வருடங்கள் ஒன்றாக வாழ்ந்த இந்த தம்பதி, கடந்த 2025 டிசம்பரில் பிரிந்தனர். மிகவும் சிறு வயதிலேயே திருமணம் நடந்ததால், தங்களுக்கு இடையேயான உறவு உண்மையான காதலா அல்லது வெறும் ஈர்ப்பா என்பதே தனக்குத் தெரியவில்லை என எமிலியானே தனது கடந்தகால உறவு குறித்து குறிப்பிட்டிருந்தது குறிப்பிடத்தக்கது.