காஞ்சிபுரம் மாவட்டம் ஏனாத்தூரில் செயல்பட்டு வரும் ஸ்ரீ சந்திரசேகரேந்திர சரஸ்வதி விஸ்வ மகா வித்தியாலயா பல்கலைக்கழக விடுதியில் ஒரு துயர சம்பவம் நிகழ்ந்துள்ளது. ஆந்திர மாநிலத்தைச் சேர்ந்த 19 வயதான மூன்றாம் ஆண்டு மாணவி நிகிதா, தனது விடுதி அறையில் சடலமாக மீட்கப்பட்டுள்ளார். சுமார் மூன்று நாட்களாகப் பூட்டப்பட்டிருந்த அவரது அறையைத் திறந்து பார்த்தபோதுதான் அவர் தற்கொலை செய்து கொண்டது தெரியவந்தது. பல மாநில மாணவர்களும் தங்கிப் படிக்கும் இந்த வளாகத்தில், மாணவி இறந்து இத்தனை நாட்களுக்குப் பிறகே உடல் கண்டுபிடிக்கப்பட்டது அனைவரையும் அதிர்ச்சியில் ஆழ்த்தியுள்ளது.
மாணவியின் மரணத்திற்கு முறையான விசாரணை கோரியும், அதற்கான உண்மையான காரணத்தை உடனடியாகக் கண்டறிய வலியுறுத்தியும் சக மாணவ, மாணவிகள் நள்ளிரவில் மாபெரும் போராட்டத்தில் ஈடுபட்டனர். இப்போராட்டத்தைக் கட்டுப்படுத்த வந்த காவல்துறையினருக்கும் மாணவர்களுக்கும் இடையே கடும் வாக்குவாதம் ஏற்பட்டது. இதற்கிடையே, நீதி கேட்டுத் தொடர்ந்து போராடிய மாணவிகளில் 10 பேர் திடீரென மயக்கமுற்றனர். அவர்கள் உடனடியாக மீட்கப்பட்டு, மருத்துவமனையில் சிகிச்சைக்காக அனுமதிக்கப்பட்டுள்ளதால் கல்லூரி வளாகத்தில் பெரும் பரபரப்பு ஏற்பட்டது.
தகவலறிந்து வந்த காவல்துறையினர் மாணவியின் உடலைக் கைப்பற்றிப் பிரேதப் பரிசோதனைக்கு அனுப்பியுள்ளனர். மேலும், அவரது பெற்றோருக்குத் தகவல் தெரிவிக்கப்பட்டு தீவிர விசாரணை முடுக்கிவிடப்பட்டுள்ளது. முழுமையான விசாரணைக்குப் பிறகே மரணத்திற்கான காரணம் உறுதி செய்யப்படும் என்பதால் அங்கு தொடர்ந்து பதற்றமான சூழல் நிலவுகிறது. உதவிக்கு: தற்கொலை எந்தவொரு பிரச்சனைக்கும் தீர்வாகாது. மன அழுத்தம் அல்லது தற்கொலை எண்ணங்கள் இருந்தால் உடனடியாக ‘சினேகா’ தற்கொலை தடுப்பு உதவி மையத்தை +91 44 2464 0050 என்ற எண்ணில் தொடர்பு கொண்டு ஆலோசனை பெறலாம்.