மேற்கு வங்க மாநிலம் கொல்கத்தாவின் மிர்ஷா காலிப் வீதியில் அமைந்திருந்த தனியார் தங்கும் விடுதி ஒன்றில் நள்ளிரவு சுமார் 2 மணியளவில் திடீரென பயங்கர தீவிபத்து ஏற்பட்டது. இதில் மருத்துவ சிகிச்சைக்காக இந்தியா வந்திருந்த வங்கதேசத்தைச் சேர்ந்த 9 பேர் பரிதாபமாக உயிரிழந்தனர். நள்ளிரவு நேரம் என்பதால் விடுதியில் தங்கியிருந்தவர்கள் தூக்கத்தில் ஆழ்ந்திருந்த நிலையில், தீ மளமளவென பிற பகுதிகளுக்கும் பரவியதால் அவர்களால் உடனடியாக வெளியேற முடியவில்லை. தகவலறிந்து விரைந்து வந்த தீயணைப்பு மற்றும் மீட்புக் குழுவினர் நீண்ட போராட்டத்திற்குப் பிறகே தீயைக் கட்டுக்குள் கொண்டுவந்தனர். இச்சம்பவத்தில் காயமடைந்த பலர் மீட்கப்பட்டு உடனடியாக மருத்துவமனையில் தீவிர சிகிச்சைக்காக அனுமதிக்கப்பட்டுள்ளனர்.
அறையில் இருந்த குளிர்சாதனப் பெட்டி (AC) வெடித்ததே இந்த விபத்திற்குக் காரணமாக இருக்கலாம் என்று முதற்கட்டத் தகவல்கள் தெரிவிக்கின்றன. மேலும், விடுதியில் போதிய தீத்தடுப்பு முன்னெச்சரிக்கை நடவடிக்கைகள் எடுக்கப்படவில்லை என்று அதிகாரிகள் குற்றம்சாட்டியுள்ள நிலையில், இது தொடர்பாக காவல்துறை வழக்குப்பதிவு செய்து தீவிர விசாரணை நடத்தி வருகிறது. சில தினங்களுக்கு முன்புதான் மேற்கு வங்கத்தின் பிர்பும் மாவட்டத்தில் உள்ள விடுதி ஒன்றில் ஏற்பட்ட தீவிபத்தில் 9 பேர் உயிரிழந்தனர் என்பதும், அதேபோன்று கொல்கத்தாவிலும் இந்த சோகச் சம்பவம் நிகழ்ந்துள்ளது என்பதும் குறிப்பிடத்தக்கது.